Premer-ministrdiń orynbasary – ulttyq ekonomika ministri Serik Jumanǵarin Qazaqstanda turǵyn úi baǵasynyń ósýine salyq reformasynyń tikelei áseri joq ekenin málimdedi, dep habarlaidy Dalanews.kz.
Ministrdiń aitýynsha, jańa Salyq kodeksiniń normalary 2025 jylǵy 31 jeltoqsanǵa deiin qurylysy bastalǵan nysandarǵa qoldanylmaidy.
«Qazir kóp adam turǵyn úi qymbattap jatyr dep aityp júr. Biraq onyń qalai jumys isteitinin túsiný kerek. Salyq reformasynyń turǵyn úige qazir eshqandai áseri joq. Múmkin, ol tek salynyp bitetinin kútetin úilerge áser etip jatqan shyǵar. Al 2025 jylǵy 31 jeltoqsanǵa deiin bastalatyn barlyq nysandarǵa Salyq kodeksi qoldanylmaidy», – dep túsindirdi Jumanǵarin.
Onyń sózinshe, turǵyn úi qurylysynyń ortasha merzimi 1,5–2 jyl bolǵandyqtan, mundai nysandar 2026 jyly da jańa salyqtarǵa ilinbeidi.
Jýrnalister jyljymaityn múlik naryǵy baǵa shegine jetti me jáne jańa QQS engizilgen jaǵdaida taǵy ósim bola ma degen saýal qoidy.
Bul suraqqa jaýap bergen ministr naryqqa áser etpeý úshin naqty boljam aitýdan bas tartty. Degenmen, biyl turǵyn úi baǵasynyń óskenin rastady.
«Bul – naryqtyq faktorlarmen bailanysty: suranys pen usynys, sondai-aq teńge baǵamynyń álsireýi de belgili bir deńgeide yqpal etýi múmkin», – dedi ol.
Serik Jumanǵarinniń aitýynsha, jyljymaityn múlik baǵasynyń dinamikasy bir ǵana sheshimge nemese reformaǵa emes, birneshe faktorǵa táýeldi.
