Jetisýdaǵy Daýylbai qorǵanynan altyn áshekeiler men kóne jádigerler tabyldy, dep habarlaidy Dalanews.kz Vestnik19.kz saityna silteme jasap.
Oblystyq mádeniet, arhivter jáne qujattama basqarmasynyń málimetinshe, 2023–2024 jyldary tarih ǵylymdarynyń doktory D. Baiǵunakovtyń jetekshiligimen Daýylbai qorǵanynda dalalyq arheologiialyq zertteýler júrgizilgen. Qazba jumystarynyń nátijesinde altyn buiymdardyń synyqtary, altyn monshaqtar, altyn syrǵalar, súiekten jasalǵan túimeler, qola túireýishter, aiylbastar jáne ózge de qola zattar, sondai-aq keramikalyq ydystar tabylǵan. Qazirgi ýaqytta barlyq artefaktiler M.Tynyshpaev atyndaǵy oblystyq tarihi-ólketaný mýzeiiniń qorynda saqtaýly.
Jýyrda «Ǵylymi-eksperimenttik qoldanbaly arheologiia» JShS mamandary osy jádigerlerdi qalpyna keltirý jumystaryn júrgizdi. Restavratsiia barysynda metall buiymdardaǵy korroziia men totyǵý izderi muqiiat tazartylyp, keramikalyq jáne súiekten jasalǵan zattardyń bólshekteri qalpyna keltirildi.
Vedomstvo taratqan aqparatta bylai delingen:
«Bul artefaktiler – kóne dáýirlerdiń turmys-tirshiligin, nanym-senimderin, ónerin jáne mádenietin tanytatyn baǵa jetpes mura. Olar – ótkenniń bir bóligi ǵana emes, búgingi urpaqqa jetken rýhani jylnama. Jaqyn ýaqytta qundy jádigerler mýzei ekspozitsiiasynan oryn alyp, kelýshilerge kórsetiletin bolady».
Daýylbai jotasy otandyq arheologtar úshin áli tolyq zerttelmegen aýmaq sanalady, biraq ol talai tarihi qupiiany jasyrǵan. Á. Marǵulan atyndaǵy Arheologiia institýtynyń qyzmetkerleri 100 sharshy shaqyrymnan asatyn zerttelgen aýmaqta 190-nan astam arheologiialyq nysandy tirkegen. Olardyń qatarynda 20-dan astam jartas sýretteri shoǵyry, 20-dan astam ejelgi qonys pen turaq, sondai-aq qola dáýirinen jańa zamanǵa deiingi 150-ge jýyq qorym keshenderi bar.
Bul aimaqtyń ereksheligi osynda elitalyq jerleý keshenderine jatatyn qorǵandyq qurylymdardyń kezdesýi. Bul bolashaqta ǵylymǵa jańa jańalyqtar men kútpegen sensatsiialar ákelýi múmkin ekenin kórsetedi.
