Jer berilmeidi
Májiliste búgin jer daýynan keiin ázirlengen keibir zańnamalyq aktilerge jer qatynastaryn retteý máseleleri boiynsha ózgerister men tolyqtyrýlar engizý týraly zań jobasy birinshi oqylymda qaraldy.
Zań jobasy Jer komissiiasy jumysynyń qorytyndysy jáne osy salany júielendirýge qatysty ministrliktiń usynystary negizinde daiyndalǵan.
Zań jobasyna sáikes, shekara aýmaǵyndaǵy aýyl sharýashylyǵy jerlerin paidalaný talaptary kúsheitilip otyr.
“Zań jobasynda shekaralyq beldeý men shekara aýmaǵynda ornalasqan jer ýchaskelerin sheteldikterge, azamattyǵy joq adamdarǵa, Qazaqstan Respýblikasynyń sheteldiktermen nekede turǵan azamattaryna nemese sheteldik zańdy tulǵalarǵa jáne Qazaqstan Respýblikasynyń quramynda sheteldikter bar zańdy tulǵalaryna berýge tyiym salynady”, — dep baiandady búgin májilistiń jalpy otyrysynda premer-ministrdiń orynbasary — aýylsharýashylyǵy ministri Asqar Myrzahmetov.
Memlekettik shekaranyń aýmaǵynda ornalasqan aýylsharýashylyǵy jerleri tek Qazaqstan azamattary men zańdy tulǵalaryna ǵana jalǵa berý quqyǵy boiynsha beriletin bolady.
Al memlekettik shekaranyń shekaralyq beldeýinde ornalasqan jerler qazaqstandyqtarǵa da berilmeidi.
Ministrdiń aitýynsha, bul aýmaqtarda aýyl sharýashylyǵy jerlerin jergilikti halyqtyń muqtajdyǵy, iaǵni, jaiylym, shabyndyq retinde ǵana paidalanýǵa ruqsat etilmek.
“Zań jobasynda jergilikti turǵyndardyń aýla malyna jaiylym jetispeýshiligin sheshý maqsatynda eldi mekender ainalasynda jaiylym alańdaryn aiqyndaityn norma kózdelýde. Osy maqsatta aiqyndalǵan jaiylymdardy Qazaqstannyń jeke jáne zańdy tulǵalaryna jalǵa berýge tyiym salynatyn bolady. Búgingi kúni eldi mekenderdiń mańyndaǵy jaiylymdardyń kóbi jeke jáne zańdy tulǵalarǵa berilip ketkendigin eskerip, ákimdikterge ol jerlerdi qaitarý úshin memlekettik muqtajǵa jatqyzý quqyǵy berilip otyr”, — dedi Myrzahmetov.
Eske sala ketsek, byltyr elimizde jer daýy týyndap, halyq biraz dúrlikken bolatyn. El azamattary jer kodeksine engizilgen birneshe ózgeriske, atap aitqanda, aýylsharýashylyǵy maqsatyndaǵy jerdi qazaqstandyqtarǵa satý jáne sheteldikterge jalǵa berý merzimin uzartýǵa qarsylyq tanytyp, birneshe óńirde miting te ótti.
Osydan keiin prezident jer kodeksindegi bul ózgeristerdiń kúshine enýine moratorii jariialap, jer reformasy jónindegi komissiia qurýdy tapsyrdy. Úkimet basshysy Baqytjan Saǵyntaev, keiin onyń orynbasary, aýylsharýashylyǵy ministri Asqar Myrzahmetov tóraǵalyq etken, quramyna jetpisten astam adam kirgen komissiia jaz boiy jumys istedi. Onyń jumysynyń qorytyndysy boiynsha mańyzdy usynystar ázirlenip, zań jobasy ázirlendi.
Komissiianyń usynysy boiynsha Qazaqstan prezidenti qoldanystaǵy moratoriidiń merzimin 5 jylǵa, iaǵni 2021 jyldyń 31 jeltoqsanyna deiin uzartty.
