Batys Qazaqstan oblysynyń Aqsai qalasyndaǵy qulaǵaly turǵan jataqhana turǵyndary 4 qazan kúni oblystyq ákimdik ǵimaraty aldyna jinaldy. Halyq aýdan biligi usynǵan ýaqytsha baspananyń nasharlyǵyna narazylyq bildirip, bólmelerin jekeshelendirýge ruqsat berýin surady.
Olar órt qaýipsizdigi men tazalyq erejelerine sai emes ǵimaratty tastap ketpei otyr.
Bastamashyl top ókilderimen oblys ákiminiń orynbasary Marat Toqjanov kezdesip, jataqhana turǵyndaryna "eshkim dalada qalmaidy" degen ýáde berdi. Biraq ákimniń orynbasary turǵyndardyń bári "memleketten baspana ala almaitynyn" eskertti.
Bastamashyl top pikiri ekige jaryldy. Olardyń bir bóligi jataqhanadan qýmaýyn surasa, qalǵandary ýaqytsha baspanada turýǵa kelisti, biraq turǵyndar vahtaly Aqsai qalashyǵyndaǵy bilik usynǵan baspanaǵa kóńilderi tolmaidy.
Bilik ókilderiniń aitýynsha, jataqhana kez kelgen ýaqytta qulap túsýi múmkin. Qazirgi tańda bul ǵimaratta 76 otbasy - shamamen 200-dei adam turyp jatyr, olardyń 67-i osy jataqhanada tirkelgen.
