Qorǵanys ministriniń birinshi orynbasary – Bas shtab bastyǵy Sultan Qamaletdinov áskerge shaqyrylýshylardy kósheden “ustaý” jaǵdailaryna qatysty pikir bildirdi, dep habarlaidy Dalanews.kz.
Jýrnalister áskeri qyzmetkerlerdiń keide jastardy kóshede kúshtep áketip jatqanyn aityp, mundai áreketterdiń zańdylyǵyn surady.
“Ókinishke qarai, ondai faktiler bar. Bul, árine, jol berýge bolmaityn nárse. Biraq aita ketetin jait – prezident zań men tártipti aiqyndap berdi. Konstitýtsiianyń 36-babynda bul erikti tańdaý emes, azamattyń mindeti jáne boryshy dep jazylǵan. Iaǵni, ol ony oryndaýǵa tiis. Al eger oryndamasa, zań sol azamatqa da qoldanylady”, – dep jaýap berdi Sultan Qamaletdinov.
Sondai-aq ol óziniń qyzmet atqarý kezeńinde áskerge shaqyrylýshylardy kúshtep áketkenderge qatysty eshkimniń jaýapkershilikke tartylmaǵanyn atap ótti. Biraq eger azamattar óz quqyqtarynyń buzylǵanyn sezinse, sotqa shaǵymdanýǵa quqyly ekenin aitty.
Eske salaiyq, buǵan deiin memleket basshysy Qasym-Jomart Toqaevtyń jarlyǵy boiynsha 2025 jyly 42 098 azamatty áskeri qyzmetke shaqyrý týraly sheshim qabyldanǵan edi.
“Oblystardyń, Astana, Almaty jáne Shymkent qalalarynyń ákimderine zańnamada belgilengen tártippen:
1. shaqyrý komissiialarynyń jumysyn uiymdastyryp, 2025 jyldyń naýryz-maýsym jáne qyrkúiek-jeltoqsan ailarynda 18-27 jas aralyǵyndaǵy, áskerge shaqyrýdan bosatýǵa nemese keiinge qaldyrýǵa quqyǵy joq er azamattardy merzimdi áskeri qyzmetke shaqyrýdy qamtamasyz etý;
2. Qazaqstan Respýblikasynyń zańnamasyna sáikes, áskeri shaqyrý pýnktterin meditsinalyq qamtamasyz etýdi uiymdastyrý júktelsin”, – delingen Úkimettiń jarlyqty iske asyrý jónindegi qaýlysynda.
Ishki ister ministrligine áskerge shaqyrylýshylardy jinaý jáne áskerge jiberý oryndarynda quqyqtyq tártipti qamtamasyz etý maqsatynda politsiia qyzmetkerleriniń kúsheitilgen kezekshiligin uiymdastyrý tapsyryldy.
Sonymen qatar Qazaqstan Respýblikasy Kólik ministrligine áskeri qyzmetin ótep bolǵan azamattardy zapasqa shyǵarý jáne merzimdi áskeri qyzmetke shaqyrylǵandardy Qazaqstan Respýblikasynyń Qarýly Kúshteri, Ishki ister ministrligi, Tótenshe jaǵdailar ministrligi, Ulttyq qaýipsizdik komiteti, Memlekettik kúzet qyzmeti bólimshelerine tasymaldaýdy qamtamasyz etý júkteldi.
Qorǵanys, Ishki ister, Tótenshe jaǵdailar ministrlikterine áskerge shaqyrylǵandar men zapasqa shyǵarylǵan sarbazdardy tasymaldaýǵa ketken shyǵyndardy respýblikalyq biýdjetten bólingen qarajat sheńberinde tasymaldaý qyzmetin kórsetetin uiymdarǵa tikelei óteý mindetteldi.
