Izrail áskeri ushaqtary Siriianyń soltústik-batysyndaǵy Idlib provintsiiasynda ornalasqan Ábý ád-Dýhýr áskeri áýe bazasyna segiz ret soqqy jasady, dep habarlaidy dalanews.kz.
Reuters málimetinshe, shabýyl seisenbi kúni tańerteń bolǵan. Siriianyń memlekettik Ekhbariya telearnasy áskeri derekkózge silteme jasap, soqqylardyń áýe bazasynyń ushý-qoný jolaǵy men qoimalaryna baǵyttalǵanyn habarlady.
Shabýyl saldarynan áskeri nysannyń infraqurylymyna materialdyq zalal kelgen. Áskeri derekkóz ben baza mańynda turatyn turǵynnyń aitýynsha, qaza tapqandar men jaralanǵandar týraly aqparat joq.
Izrail áskeri shabýylǵa qatysty túsinikteme bermedi. Siriianyń Qorǵanys ministrligi de Reuters agenttiginiń saýalyna jaýap bergen joq.
Ábý ád-Dýhýr áskeri bazasy Túrkiia shekarasynan shamamen 70 shaqyrym jerde ornalasqan. Nysan 2013 jyldan beri tolyqqandy áskeri áýe bazasy retinde paidalanylmaǵan. Siriiadaǵy 14 jyldyq azamattyq soǵys kezinde baza birneshe ret ártúrli kúshterdiń baqylaýyna ótken.
Reuters málimetinshe, bul Ábý ád-Dýhýr bazasyna 2024 jyldyń jeltoqsanynda Bashar Asad biligi qulaǵannan keiin jasalǵan alǵashqy shabýyl. Izrail Asad biligi qulaǵannan beri Siriiadaǵy áskeri nysandarǵa birneshe ret soqqy jasaǵan.
Izrail buǵan deiin Siriiadaǵy áskeri infraqurylymǵa jasalǵan soqqylaryn óz qaýipsizdigin qamtamasyz etý jáne qarý-jaraq pen áskeri tehnikanyń jańa biliktiń qolyna ótýine jol bermeý qajettigimen túsindirgen.
