Qarjylyq monitoring agenttigi tóraǵasynyń orynbasary Jeńis Elemesov Perizat Qairattyń isine qatysty túsinikteme berdi, dep habarlaidy Dalanews.kz.
Onyń aitýynsha, tergeý isi aiaqtalǵan, qazir is materialdarymen tanysý protsesi júrip jatyr.
“Qylmystyq is sozylyp jatqan joq. Tergeý tolyq aiaqtalǵan. Qazir taraptar is materialdarymen tanysyp jatyr. Bul – zańda kórsetilgen mindetti protsess. Perizat Qairattyń ózi osy tanysý protsesin uzartqandyqtan, arnaiy grafik bekitildi. Sol kestege sáikes, tanysý 9 maýsymda aiaqtalady”, – dedi Elemesov.
Onyń aitýynsha, tanysý kezeńi bitkennen keiin úsh kún ishinde is materialdary hattama túrinde rásimdelip, ári qarai on kún ishinde prokýratýra sheshim qabyldaidy.
Jýrnalist “Sottalýshy retinde bul iste tek eki adam ǵana bar ma?” dep suraq qoidy.
“Iá, qazirgi tańda qylmystyq is boiynsha sottalýshy retinde tek eki adam – Perizat Qairat pen onyń anasy ǵana tartylyp otyr”, – dep jaýap berdi Elemesov.
Sot otyrysy qashan ótedi?
Sot otyrysynyń naqty kúni ázirge belgisiz. Alaida zańnamaǵa sáikes, is materialdarymen tanysý 9 maýsymda aiaqtalyp, ary qarai belgilengen merzimderge sai sotqa joldanady.
“9 maýsymnan keiin úsh kún ishinde hattama daiyndalady, sosyn 10 kún ishinde prokýratýra sheshim qabyldaidy. Osydan soń ǵana sot otyrysynyń naqty kúni belgili bolady”, – dep naqtylady QMA ókili.
Perizat Qairatqa qatysty is
Perizat Qairat - Biz Birgemiz Qazaqstan qaiyrymdylyq qorynyń tóraiymy, Qazaqstandaǵy belsendi eriktiler qozǵalysynyń jetekshisi retinde tanymal. Ol sý tasqynynan zardap shekkenderge kómek kórsetý, Gaza sektoryndaǵy gýmanitarlyq missiialar jáne basqa da qaiyrymdylyq sharalarymen ainalysyp, qoǵamda bedelge ie boldy.
Alaida 2024 jyly 14 qarashada Qarjylyq monitoring agenttigi Perizat Qairat 1,5 milliardty jymqyrdy degen kúdikke ilingenin habarlady.
Sonymen qatar, ol 2023 jylǵy qarashada Palestina turǵyndaryna gýmanitarlyq kómek kórsetý úshin qarajat jinap, onyń 200 millionyn qaltasyna basqan degen kúdikke ilindi. QMA dereginshe, 2023 jylǵy jeltoqsanda osy aqsha esebinen Perizat Qairat Sensata Plaza elitalyq kesheninen 49 million teńgege úsh bólmeli páter jáne 30 million teńgege Mercedes-Benz EQE 500 4 Matic jańa kóligin satyp alǵan.
2024 jyly 16 qarashada Astana qalasynyń tergeý soty Perizat Qairat 2 aiǵa qamaýǵa alynǵanyn habarlady. Jýyrda Perizat Qairatqa qatysty isti tergeý aiaqtaldy.
