Izrail barlaý qyzmetiniń málimetinshe, Iran basshylyǵy AQSh prezidenti Donald Trampqa qastandyq jasaýdy josparlap otyr. Tiisti barlaý aqparaty Vashingtonǵa joldanǵan. Bul týraly The Wall Street Journal (WSJ) basylymy habarlady, dep jazady dalanews.kz.
WSJ málimetinshe, Iran biligi buǵan deiin ázirlengen josparlardy qaita qarap, jańartqan. 2020 jyldyń qańtarynda Tramptyń buiryǵymen Irannyń "Ál-Quds" kúshteriniń qolbasshysy general Qasem Súleimanidiń kózin joiý operatsiiasynan keiin Tegeran AQSh-tan kek alýǵa ýáde bergen bolatyn. Baǵdad áýejaiy mańynda MQ-9 Reaper ushqyshsyz apparaty arqyly jasalǵan shabýyldan keiin Iran AQSh-tyń óńirdegi áskeri bazalaryna soqqy berip, Tramptan kek alý josparyn qarastyra bastaǵan.
Basylymnyń jazýynsha, Izrail barlaý qyzmeti anyqtaǵan qastandyq jospary jaqynda qaita pysyqtalǵan. Al CNN telearnasy shabýyldyń tipti "naqty" jospary bar ekenin habarlady. Aqparatqa sáikes, Iran biliginiń mundai qadamǵa barýyna 2026 jylǵy 28 aqpanda Irannyń Joǵarǵy kóshbasshysy aiatolla Áli Hameneidiń óltirilýi túrtki bolǵan.
NATO sammitinen keiin Túrkiiadan Air Force One ushaǵymen qaityp kele jatqan Donald Tramp jýrnalisterge Irannyń nysanasyna ainalǵanyn málimdedi.
"Olar AQSh prezidentin – meni – joiǵysy keledi. Búgin tańerteń olardyń barlyq "joiý tiziminde" turǵanymdy kórdim. Osy ýaqytqa deiin jolym bolyp keldi, biraq bul uzaqqa sozylmaýy múmkin", – dedi Tramp.
Aita keteiik, bul aqparat ázirge resmi túrde AQSh nemese Iran biligi tarapynan tolyq rastalǵan joq. Málimetter sheteldik BAQ pen barlaý derekterine súienip jariialanǵan.
