Frantsiiada 2026-2027 oqý jylynan bastap joǵary synyp oqýshylaryna mektepte uialy telefon jáne basqa da bailanys qurylǵylaryn paidalanýǵa tyiym salyndy. Bul shara buǵan deiin bastaýysh jáne orta mektepterde engizilgen shekteýdi litseilerge de keńeitti, dep habarlaidy dalanews.kz.
Frantsiianyń Bilim ministrligi jańa tártipti oqýshylardyń oqý protsesine kóńil bólýin arttyrý jáne mekteptegi ahýaldy tynyshtandyrý maqsatymen túsindirdi. Vedomstvo málimetinshe, 2025 jylǵy zertteýde 15-19 jastaǵy frantsýz jasóspirimderi ekran aldynda táýligine orta eseppen 5 saǵat 19 minýt ótkizetini anyqtalǵan. Uzaq ýaqyt ekran qoldaný kórý qabiletine, uiqyǵa, zeiin qoiýǵa jáne áleýmettik qarym-qatynasqa áser etýi múmkin.
Jańa talap boiynsha litseilerdiń ishki tártibinde telefondardy paidalanýǵa qatysty naqty tártip belgilenedi. Kei jaǵdailarda oqý maqsatyndaǵy paidalaný nemese densaýlyq jaǵdaiyna bailanysty erekshelikter qarastyrylýy múmkin.
Frantsiia mektepterinde telefon máselesi birneshe jyldan beri talqylanyp keledi. 2018 jyldan bastap bastaýysh jáne kolledj deńgeiindegi oqýshylarǵa mektepte telefon qoldanýǵa tyiym salynǵan. Al 2024-2025 oqý jylynan bastap birqatar oqý oryndarynda «Portable en pause» dep atalatyn júie synaqtan ótip, oqýshylardyń smartfondaryn arnaiy shkaftarǵa nemese qaptarǵa ótkizý tájiribesi engizilgen.
Endi bul tásil joǵary synyptarǵa da taratylady. Frantsýz biligi muny tek tártip sharasy emes, balalardyń tsifrlyq ortaǵa shamadan tys táýeldiligin azaitýǵa baǵyttalǵan saiasattyń bir bóligi retinde qarastyryp otyr.
Frantsiia biligi mekteptegi telefon shekteýin jastardyń áleýmettik jelilerdi paidalanýyna qatysty jańa sharalarmen qatar engizip jatyr. 2026 jyly el parlamenti 15 jasqa tolmaǵan balalardyń áleýmettik jelilerdi paidalanýyna shekteý qoiý týraly zańdy maquldady. Bul shara boiynsha jańa akkaýnttarǵa jas ereksheligine qatysty tekserý 1 qyrkúiekten bastalýy tiis, al burynnan bar akkaýnttarǵa shekteý 2027 jyldyń 1 qańtarynan qoldanylmaq.
Osylaisha Frantsiia mekteptegi smartfondardy shekteýdi bastaýysh synyptardan joǵary synyptarǵa deiin keńeitip, jasóspirimderdiń ekran ýaqytyn azaitýǵa baǵyttalǵan keshendi saiasat qalyptastyryp otyr.
