Qazaqstanda gýmanoid robottar shyǵaratyn óndiris qurý josparlanyp otyr. Joba halyqaralyq AgiBot tehnologiialyq kompaniiasymen birlesip júzege asyrylady. Bul týraly Ǵylym jáne Joǵary bilim ministrligi málimdedi, dep habarlaidy dalanews.kz.
Joba Astanadaǵy Alem.ai alańynda ótken Qazbot Robotics Forum barysynda tanystyryldy. Is-sharaǵa memlekettik organdardyń, joǵary oqý oryndarynyń, tehnologiialyq kompaniialar men sarapshylar qaýymdastyǵynyń ókilderi qatysty.
Jospar boiynsha Qazaqstanda gýmanoid robottar men Embodied AI tehnologiialaryn ázirleý jáne óndirý qolǵa alynady. AgiBot kompaniiasymen seriktestik aiasynda sheteldik tehnologiialardy elde jergiliktendirý, injenerlik quzyretterdi damytý, ǵylymi zertteýler júrgizý jáne mamandar daiarlaý kózdelgen.
Ǵylym jáne joǵary bilim ministri Saiasat Nurbektiń aitýynsha, bastamanyń maqsaty daiyn tehnologiialardy paidalanýmen ǵana shektelmei, Qazaqstannyń ózindik ǵylymi jáne injenerlik áleýetin qalyptastyrýǵa baǵyttalǵan.
"Bizdiń mindetimiz – daiyn tehnologiialyq sheshimderdi engizýmen ǵana shektelmei, Qazaqstanda ózimizdiń injenerlik jáne ǵylymi quzyretterimizdi qalyptastyrý. Gýmanoid robottar óndirisi ýniversitetterdi, ǵalymdar men indýstriiany birtutas tehnologiialyq tizbekke biriktiretin alańǵa ainalýy tiis. Bul – mamandar daiarlaý men ǵylymi zertteýlerden bastap, tehnologiialyq sheshimderdi ázirleý jáne olardy ónerkásipte qoldanýǵa deiingi tolyq tsikl", - dedi ministr.
Qazirgi ýaqytta qazaqstandyq joǵary oqý oryndarynda robototehnika, mehatronika, ónerkásiptik avtomattandyrý, intellektýaldy júieler jáne jasandy intellekt baǵyttary boiynsha 56 bilim berý baǵdarlamasy júzege asyrylyp jatyr. Stýdentterdiń jasandy intellekt salasyndaǵy quzyretterin damytý úshin AI-Sana baǵdarlamasy da iske qosylǵan.
Qazaqstandyq ýniversitetter men AgiBot arasyndaǵy yntymaqtastyq jeke baǵyt retinde damytylady. Onyń aiasynda ǵalymdar, oqytýshylar jáne stýdentter gýmanoid robototehnika men jasandy intellekt salasyndaǵy zertteýlerge tartylady. Sonymen qatar, ozyq robototehnikalyq tehnologiialardy otandyq ónerkásiptiń qajettilikterine beiimdeý josparlanǵan.
Jobaǵa Nazarbaev Ýniversitetiniń Aqyldy júieler jáne jasandy intellekt institýty (ISSAI) da qatysady. Institýt gýmanoid robototehnika salasyndaǵy ǵylymi zertteýler men júielik integratsiiaǵa jaýapty seriktes bolady.
Forým barysynda Saiasat Nurbek QAZBOT jáne AgiBot basshylarymen kezdesip, injenerlik kadrlar daiarlaý, beiindi zerthanalar ashý jáne birlesken ǵylymi zertteýler júrgizý máselelerin talqylady. Sondai-aq stýdentter men ǵalymdardy gýmanoid robottardy ázirleýge baǵyttalǵan jobalarǵa tartý jaiy sóz boldy.
Jobany júzege asyrý arqyly bilim, ǵylym jáne óndiris arasyndaǵy bailanysty kúsheitip, Qazaqstanda robototehnika men jasandy intellekt salasyndaǵy ózindik tehnologiialyq baza qalyptastyrý kózdelip otyr.
