Májilis spikeri Erlan Qoshanov sý tasqyny kezinde keibir depýtattar óńirlerdi aralap, halyqpen birge bolǵanyn atap ótti, dep habarlaidy Dalanews.kz.
Májilis otyrysynda depýtat, Amanat partiiasy fraktsiiasynyń múshesi Rinat Zaiytov Erlan Qoshanovqa kún tártibi boiynsha qoiatyn bir suraǵy bar ekenin jetkizdi.
"Elde bolyp jatqan úlken apat boiynsha talqylaý bola ma?", - dep surady ol.
Óz kezeginde Erlan Qoshanov sý tasqyny kezinde birqatar depýtat óńirlerdi aralap, halyqtyń janynda bolǵanyn alǵa tartty. Aitýynsha, bul jumys áli de jalǵasyn tabady.
"Naqty kómek kórsetilip jatyr. Meniń oiymsha, osy jerde otyryp áńgime aitý emes, osyndai jumys kerek. Sondyqtan jalpy otyrys aiaqtalǵan soń taǵy bir top depýtat sý tasqyny bolyp jatqan óńirlerge shyǵady. Halyqpen birge bolady", - dedi Erlan Qoshanov.
Sonymen qatar ol tótenshe jaǵdaiǵa bailanysty kóteretin máseleleri bolsa, depýtattyq saýal arqyly joldaýǵa bolatynyn aitty.
Eske salaiyq, Qazaqstannyń birshama óńirin erigen qar men tasyǵan ózen sýy basty. Halyq apatty aimaqtardan áli de evakýatsiialanyp jatyr.
Osy tusta prezident Qasym-Jomart Toqaev barlyq otandyq biznes ókilderin sý tasqynynan zardap shekkenderge kómektesýge shaqyrǵan bolatyn.
Sondai-aq memleket basshysy úkimet pen ákimdikterdiń rezervterin, "Qazaqstan halqyna" qorynyń qarajatyn da paidalaný kerektigin atap ótti.
Bul jaǵdaiǵa májilis depýtaty Maqsat Tolyqbai da pikir bildirgen edi.
Depýtattyń sózinshe, ákimdikterde eshqandai daiyndyq joq. Bul - Úkimet pen ákimdikter arasynda bailanys joq ekeniniń belgisi. Maqsat Tolyqbai bul jaǵdaiǵa kináli retinde Roman Skliardy atady.
"Tamyrynan qurttaǵan aǵash butaǵynan emdelmeidi. Roman Skliardan bastap Úkimettiń keibir múshelerin aýystyratyn kez keldi.
Aimaqtardy aralap, Aqtóbeniń ortasyna shettik. Biraq, qadirli aǵaiyn, shynyn aitý kerek, ákimdikterdiń daiyndyǵy óte nashar. Tipti basqasyn aitpaǵanda, keibir aýdan ákimderiniń rezervinde ne qaiyq joq, sý etik tabylmai jatyr. Ákimdik pen Úkimettiń arasynda bailanys joqtyń qasy desek bolady.
Buǵan birinshi kezekte kim jaýapty? Ashyǵyn aitý kerek, premer-ministrdiń orynbasary Roman Skliar jaýapty. Keshe Aqtóbege keldi. Alǵa deitin bir aýdanǵa bardy, biraq sýdyń astynda qalǵan Oiylǵa nege barmaidy?
Munyń aldynda alapat órt bolǵanyn bilesizder. Qanshama adam órtenip ketti. Buǵan da kim jaýapty? Roman Skliar jaýapty. Sógispen qutyldy.
Sondyqtan bul ózgelerge sabaq bolýy úshin Prezident sógis jariialap jatyr. Biraq Roman Skliardan bastap Úkimettiń keibir múshelerine shara qoldanyp, aýystyratyn kez keldi ǵoi dep oilaimyn", - dedi depýtat.
