Qyrǵyzstannyń Jalal-Abad oblysyna qarasty Aqsy aýdanynda 34 jastaǵy Gúlzat Qurmanbekovanyń ólimine qatysty tekserý júrip jatyr. Marqumnyń týystary onyń óz-ózine qol jumsaǵanyna senbeitinin aityp, istiń ádil tergelýin talap etti. Al kúieýiniń týystary taǵylǵan aiyptardy joqqa shyǵaryp otyr, dep habarlaidy dalanews.kz.
Gúlzat Qurmanbekova 8 tamyzda asylyp qalǵan kúiinde tabylǵan. Anasy Gúljamal Narmatovanyń sózinshe, qyzynyń denesinen túrli jaraqat belgileri baiqalǵan. Osyǵan bailanysty otbasy onyń ólimine zorlyq-zombylyq sebep bolýy múmkin dep kúdiktenedi.
Marqumnyń jaqyndary Gúlzattyń buǵan deiin de otbasynda qiyndyqtarǵa tap bolǵanyn aitady. Onyń sińlisi Nurzattyń málimdeýinshe, erli-zaiyptylar arasynda kúieýiniń basqa áielmen qarym-qatynasyna bailanysty janjal týyndaǵan.
«Ápkem ol qyzdy nemese meni tańdaisyń degende, "men ekeýińdi de tastai almaimyn, ony da tastai almaimyn, balalarymdy, senderdi de tastai almaimyn" degen. Qaitys bolardan bir kún buryn sol qyzdyń úiine baryp, janjal bolǵan. Ápkemmen sońǵy ret sóileskende óletindei jaǵdaida emes edi», – deidi marqumnyń sińlisi.
Gúlzat kúieýimen 14 jyl birge turyp, úsh bala tárbielegen.
Alaida kúieýiniń týystary marqumnyń jaqyndary aitqan nusqamen kelispeidi. Qaiyn ápkesi Gúljaina Atakanova onyń soqqydan qaitys bolǵany jáne er adamnyń ekinshi áiel alǵany týraly málimetterdi joqqa shyǵardy.
«Eshqandai soqqydan qaitys bolǵan joq. Ekeýiniń arasynda uryp-soǵyp, kógertip tastaǵan jaǵdai bolǵan emes. Inim ekinshi áiel alǵan joq. Bul – jalǵan aqparat. Uryp óltirdi degen sóz de shyndyqqa janaspaidy», – dedi ol.
Qazir marqumnyń denesine sot-meditsinalyq saraptama taǵaiyndalǵan. Onyń qorytyndysy ázirge shyqqan joq.
Jalal-Abad oblystyq militsiiasynyń málimetinshe, oqiǵa 9 tamyzda Aqsy aýdandyq ishki ister bóliminde tirkelip, tergeýge deiingi tekserý bastalǵan. Saraptama nátijesi belgili bolǵannan keiin zań aiasynda tiisti sheshim qabyldanady.
