Darknette ózin shymzz13 dep tanystyrǵan haker Qazaqstan azamattarynyń aýqymdy derekter bazasyn satýǵa shyǵarǵanyn málimdedi, dep habarlaidy dalanews.kz.
Onyń aitýynsha, bazada shamamen 15 million qazaqstandyqtyń jeke málimetteri saqtalǵan. Bul el halqynyń shamamen tórtten úsh bóligine teń. Haker derekterdi memlekettik qyzmetter portaly eGov júiesin buzý arqyly qolǵa túsirgenin alǵa tartady.
Satýshy aqparattyń qunyn 0,5 bitkoinge baǵalaǵan. Qazirgi baǵam boiynsha bul shamamen 32 myń AQSh dollaryna teń. Kólemi 2,7 gigabait bolatyn arhivte 47 millionǵa jýyq jazba bar ekeni aitylǵan.
Jariialanǵan málimetterge sáikes, bazada azamattardyń jeke kýálik derekteri, telefon nómirleri, elektrondyq poshta mekenjailary, jumys oryndary týraly aqparat, qujattardyń skanerlengen kóshirmeleri jáne parolder bolýy múmkin.
Aita keteiik, sońǵy ýaqytta eGov júiesiniń jumysyna qatysty birneshe máseleler tirkelgen bolatyn. Tamyz aiynyń basynda keibir qoldanýshylar serviske kirgen kezde ózge azamattardyń jeke kabinetterine qol jetkize alǵanyn habarlaǵan. Al kóktemde qazaqstandyq qarjy sarapshysy eGov arqyly kompaniia tirkegennen keiin birneshe saǵat ishinde jarnamalyq qońyraýlar ala bastaǵanyn málimdegen.
Kiberqaýipsizdik mamandary mundai kólemdegi derekter bazasy alaiaqtardyń qolyna tússe, azamattar úshin eleýli qaýip tóndirýi múmkin ekenin eskertedi. Sarapshylardyń pikirinshe, aqparatty túrli telefon alaiaqtary men kiberqylmystyq toptar paidalanyp ketýi yqtimal.
Alaida qazirgi ýaqytta derekter bazasynyń shynaiylyǵy men onyń naqty qai júieden alynǵany resmi túrde rastalǵan joq. Sondyqtan jariialanǵan aqparatqa saqtyqpen qaraý qajet.
