Bilik partiiasy fizrýktardyń ailyǵyn kóbeitip, buqaralyq sportty damytýdy kózdeýde
Elimizdegi jetekshi saiasi uiymnyń baspasóz qyzmeti taratqan habarlamada elimizdegi kásibi sport klýbtaryn ustaýǵa baǵyttalǵan qarjy halyqty, eń aldymen balalardy dene shynyqtyrý jáne buqaralyq sportpen ainalysýǵa tartýǵa baǵyttalýy tiis ekeni atap kórsetilgen.
– Elbasy, Partiia kóshbasshysy Nursultan Nazarbaevtyń tapsyrmasy boiynsha qabyldanǵan sailaýaldy ýádelerdi oryndaý jónindegi Jol kartasy aiasynda bul máselege basa mán berilýde. Memleket basshysy Qasym-Jomart Toqaev Tokioda ótken Olimpiada qorytyndysy boiynsha otandyq sportqa shuǵyl ári tiimdi reformalar júrgizý qajettigin aita kele, buqaralyq jáne balalar sportyn damytýdyń mańyzdylyǵyna erekshe nazar aýdardy, – delingen habarlamada.
Sonymen, balalar men jasóspirimder jáne balalar men jastar klýbtarynyń sany elimizdiń barlyq tirek aýyldaryn qamti otyryp, myńǵa deiin ulǵaitylady. Jattyqtyrýshy-ustazdardyń jalaqysy biyldyń ózinde 1,5 esege, al 2023 jylǵa qarai 2 esege ósedi.
Dene shynyqtyrý muǵalimderine mektepterde sport sektsiialaryn uiymdastyrǵany jáne júrgizgeni úshin negizgi bazalyq laýazymdyq jalaqysynan 100% mólsherinde qosymsha aqy qosylady.
Osy jyldyń ózinde barlyq iri aýdan ortalyqtarynda 127 myń sport sektsiialaryn ashý josparlanǵan. 22 myńnan astam balalar úiirmesiniń jumysy qaita jandanady. Árbir aýyldyq okrýgte biyldyń ózinde 3 myń sport nusqaýshysy laýazymyn engizý kózdelip otyr.
Óńirlerde sporttyq infraqurylymdy damytýǵa erekshe kóńil bólinedi. Mysaly, Qostanai oblysynyń Lisakov qalasynda alǵash ret jalpy aýdany 2 myń sharshy metrden asatyn tennis ortalyǵy ashyldy. Almaty oblysyndaǵy Raiymbek aýdanynyń Narynqol jáne Balqash aýdanynyń Baqanas aýyldarynda árqaisysy 180 oryndyq eki dene shynyqtyrý-saýyqtyrý kesheni paidalanýǵa berildi.
Ulttyq sport túrlerin damytýǵa da jańa serpin beriledi. «Nur Otan» at sporty túrlerin (báige, kókpar, aýdaryspaq, teńge ilý, jamby atý), sondai-aq qazaqsha kúres, qusbegilik, sadaq atý, toǵyzqumalaq, asyq atý, arqan tartý jáne basqa da sporttyq baǵyttardy qoldaýdy jalǵastyrady. Biyldyń ózinde olar dene shynyqtyrý pánindegi sabaqtyń mindetti komponenti retinde engiziledi.
