Aldaǵy bes jylda Jerdegi ortasha temperatýra jańa rekordtar ornatýy múmkin. Sinoptikterdiń boljamynsha, osy kezeńdegi jyldardyń biri sońǵy keminde 70 jyldaǵy eń ystyq ýaqyt retinde tirkeledi. Al eń ystyq jyl 2027 jyl bolýy yqtimal. Mundai boljamdy BUU janyndaǵy Dúniejúzilik meteorologiialyq uiym (DMU) jariialady, dep habarlaidy dalanews.kz.
Uiymnyń jańa esebinde 2026-2030 jyldar aralyǵynda Jerdiń ortasha temperatýrasy rekordtyq deńgeige jetýi múmkin ekeni aitylǵan. Meteorologtardyń baǵalaýynsha, osy kezeńdegi ortasha jyldyq temperatýra 1850-1900 jyldardaǵy kórsetkishten 1,3–1,9 gradýsqa joǵary bolýy yqtimal.
DMU málimetinshe, Jerdegi ortasha temperatýranyń indýstriiaǵa deiingi kezeńmen salystyrǵanda keminde 1,5 gradýsqa kóterilý yqtimaldyǵy 75 paiyzǵa jetken. Bul shek 2015 jylǵy Parij klimattyq kelisimi aiasynda belgilengen jahandyq jylynýdyń uzaqmerzimdi shegi sanalady.
Sondai-aq esepte 2026-2030 jyldar aralyǵyndaǵy jyldardyń biriniń baqylaý tarihyndaǵy eń ystyq jyl ataný yqtimaldyǵy 86 paiyz dep baǵalanǵan. Bul jaǵdaida ol 2024 jylǵy rekordtan asyp túsýi múmkin.
Meteorologtardyń boljamynsha, jańa rekord 2027 jyly ornaýy yqtimal. Buǵan El-Nino klimattyq qubylysynyń áseri sebep bolýy múmkin. Budan bólek, aldaǵy bes qysta Arktikadaǵy temperatýra 1991-2020 jyldardaǵy ortasha kórsetkishten shamamen 2,8 gradýsqa joǵary bolady dep kútilýde.
Al Soltústik Eýropada kelesi bes jylda qys maýsymy ádettegiden ylǵaldy bolýy múmkin. Mamandar muny óńir úshin negizgi klimattyq qaýipterdiń biri dep baǵalap otyr, óitkeni bul sý tasqyny qaýpin arttyrýy yqtimal.
