Qazaqstan álemdik týristik kartadaǵy ornyn nyǵaityp keledi. Bedeldi halyqaralyq basylym Bloomberg Almaty qalasyn 2026 jyly barýǵa usynylatyn álemniń úzdik 25 týristik baǵytynyń tizimine engizdi, dep habarlaidy Dalanews.kz.
Basylym Almaty qalasynyń jyl boiyna týristerdi tartatyn áleýetin atap ótedi. Atap aitqanda, serpindi qalalyq mádeniet, bai tarihi mura, gastronomiia jáne tabiǵi landshafttarǵa jaqyn ornalasýy Almatynyń tartymdylyǵyn arttyryp otyr.
Bloomberg dereginshe, Ortalyq Aziia dalasynda shyǵarmashylyq energiia qainap jatyr. Eldiń eń iri qalasyna qyzyǵýshylyq artyp keledi: 2025 jyldyń alǵashqy toǵyz aiynda Almatyǵa rekordtyq 2,5 million adam kelgen. Týristerdiń bir bóligi altyn kúmbezderimen áigili Sobor Zenkova men dámdeýishter, bal jáne qazy-qarta satylatyn Zelenyi bazar siiaqty tarihi nysandardy tamashalasa, endi bireýleri qala irgesindegi Zailii Alataýy taýlaryndaǵy alpilik kólder men taý shańǵysy aimaqtaryna bet alǵan.
Sonymen qatar, basylym Almatydaǵy demalystyń maýsymdyq alýan túrliligine erekshe nazar aýdarady. Qys mezgilinde týristerge taý bókterindegi Shymbulaq kýrorty usynylady.
«Bloomberg nusqasy boiynsha Qazaqstannyń álemniń úzdik 25 týristik baǵyty qataryna enýi – halyqaralyq deńgeidegi mańyzdy moiyndaý. Bul Visit Almaty brendingin ilgeriletý boiynsha atqarylǵan jumystyń nátijesi. Elimizdiń jahandyq týristik naryqtaǵy básekege qabilettiligi artyp, halyqaralyq aýditoriianyń Qazaqstanǵa degen qyzyǵýshylyǵy kúsheiip keledi. Sońǵy jyldary Qazaqstan jetekshi álemdik BAQ reitingterine jii enip júr», – dedi «UK» Kazakh Tourism» AQ basqarma tóraǵasynyń mindetin atqarýshy Daniel Serjanuly.
Aita keteiik, Bloomberg-tiń jyl saiynǵy reitingi týristik trendterdi monitoringileý, salalyq jańalyqtardy taldaý jáne týrizm salasyndaǵy sarapshylardyń baǵasy negizinde qalyptastyrylady.
