Májilis depýtaty Ermurat Bapi kýlýarda eks-prezidenttiń qyzy Áliia Nazarbaevanyń reiderlik áreketterine qatysty pikir bildirdi, - dep habarlaidy Dalanews.kz.
"Sasqan úirek quiryǵymen súńgidi dei me?! Sonyń keri ǵoi. Óz kózimmen Áliia Nazarbaevanyń qoly qoiylǵan notarialdyq qujatty kórdim. Túpnusqa. Áliia Nazarbaevanyń ózi qol qoiǵan kelisimshartty, kompaniiany ózine alý jónindegi quryltaishylyq qujatty kórdim. Rogovanyń qol qoiǵan qujattaryn kórdim. Munyń bári móri soǵylyp, qoly qoiylǵan qujattar ǵoi. Aspannan kelgen joq, bireý qoldan jasaǵan joq. Sony kóre turyp, bile turyp, osyndai qylmysty jasai turyp, kezinde menshiginen airylyp qalǵan adamdardy qasaqana, qiturqylyqpen qaita sotqa berý baryp turyp arsyzdyq dep oilaimyn", - dedi Bapi.
Depýtat "prokýratýra, sot júiesi Nazarbaevanyń yǵyna jyǵylyp ketpei me?" degen saýalǵa da jaýap berdi.
"Qazirdiń ózinde jyǵylyp jatqan syńaiy bar ǵoi. Men ózim depýtattyq saýal saldym. Oǵan jaltarma jaýap keldi. 160 million dollarlyq aktivi bar, biznesinen airylǵan jigitter sotqa berdi. Is qozǵaý jóninde prokýratýraǵa berdi. Eshqaisyna durys jaýap joq. Barlyǵynyń jaǵynda Áliia Nazarbaeva sýdan taza, sútten aq", - dedi ol.
Aita keteiik, biyl 28 aqpanda "TPK Asia" JShS quryltaishysy Nurlan Bimýrzin seriktesi Megdat Qaliev ekeýi Nazarbaeva men Rogovanyń reiderlik shabýylynyń qurbany bolǵanyn málimdegen bolatyn.
Bimýrzinniń aitýynsha, 2003 jyly Áliia Nazarbaeva óz yqpalyn paidalana otyryp, quny 170 million dollar bolatyn (2003 jylǵy esep boiynsha - esk.) jeti munai bazasy men 96 janarmai quiý beketin tartyp alǵan.
"Basynda qarjy politsiiasy qysym kórsetti. Sosyn Áliia Nazarbaevanyń ókili kelip, bizge qorǵan bolýǵa shamalary jetetinin jetkizdi. Ol úshin biznestiń 50 paiyzy berilýi keregin aitty. Bir jyldan keiin Áliia Nazarbaeva endi qalǵan úlesti de berý keregin eskertti. Sol jyly meniń ákemdi olar alyp ketip, Nazarbaevanyń keńsesine aparǵan. Ákemmen sóilesken. Eki ulyń úshin alańdasań, biznesińdi ber degen. Amal joq, ákem kelisedi.
Kelesi kúni men bardym. Ol jerde Áliia bolǵan joq, biraq onyń ornyna Rogova boldy. Men sol jerde úlesimdi bar joǵy 18 125 teńgege satýǵa májbúr boldym", - deidi Nurlan Bimýrzin.
14 naýryzda Bas prokýratýra Nazarbaevanyń reiderlik áreketi týraly aryz tirkelgenin habarlady. Alaida 5 sáýirde politsiia eks-prezidenttiń kenje qyzyna qatysty qylmystyq is qozǵaýdan bas tartqany belgili boldy.
