Qazaqstandyq tanymal prodiýser Baian Maqsatqyzy álemdik rep juldyzy Kane Ýesttiń Almatydaǵy kontsertine bailanysty óz pikirin ashyq aitty, dep habarlaidy dalanews.kz.
Prodiýser áleýmettik jelidegi jazbasynda qazaqstandyq óner ielerine qoiylatyn talaptar men sheteldik ártisterge jasalatyn jeńildikterge narazylyǵyn bildirdi. Onyń aitýynsha, kezinde «KeshYOU» tobynyń stadiondaǵy kontserti kezinde uiymdastyrýshylar birneshe márte otshashý qoldanýǵa ruqsat suraǵan. Alaida bul usynysqa qatań túrde tyiym salynǵan.
«Biz óz kontsertimizde otshashý jasaýǵa ruqsat suradyq, biraq úzildi-kesildi qarsy boldy. Qyzyq ári ókinishti jaǵdai. Ózimizge kelgende “bolmaidy”, al Kanege bolady eken. Sonda zań aldynda bári teń, biraq keibireýler erekshe jaǵdai jasala ma?» – dep jazdy Baian Maqsatqyzy.
Prodiýser sondai-aq óz komandasynyń álemdik deńgeidegi shoý uiymdastyrǵanyn aityp, Kane Ýesttiń óner kórsetý formatyna qatysty da pikirin jasyrmady.
«Biz shynymen de álemdik deńgeidegi shoý jasadyq. Al Kane sferanyń ústinde júrdi, erekshe kúsh saldy dep aita almaimyn», – dedi ol.
Keiin Baian Maqsatqyzy bul taqyrypta pikirtalastan sharshaǵanyn aityp, ironiiamen jazbasyn jalǵastyrdy.
«Kane keremet, ol júrmedi, ushty. Bizge otshashýdyń da qajeti joq. Áleýmettik jelidegi pikirlerge qarasaq, kópshilik bizdi “ekinshi sort” dep moiyndaǵan siiaqty. Jaraisyńdar!» – dep jazdy prodiýser.
Qazir Frantsiiada demalyp júrgen Baian Maqsatqyzy jaqyn arada óziniń ártisterimen ekinshi iri kontsertti uiymdastyrýǵa kirisetinin málimdedi. Onyń aitýynsha, bul kontsert Astanada ótedi jáne bilet baǵasy Kane Ýesttiń shoýynan áldeqaida arzan bolady.
«Meniń “ekinshi sortty” ártisterimniń kelesi kontsertin daiyndaýǵa kirisemin. Árine, otshashýsyz. Astanada kútemiz. Biz ózimizdiń adamdar bolǵandyqtan, bilet te áldeqaida arzan bolady. Al kásibiligimizge kúmán keltiretinderden kelmeýlerin suraimyn», – dep túiindedi ol.
