Atyraý oblysyndaǵy jekemenshik balabaqsha ókilderi vaýcherlik qarjylandyrý júiesine kóshkennen keiin memlekettik tólemderdiń keshigip jatqanyn málimdedi, dep habarlaidy dalanews.kz.
Qazaqstannyń úzdiksiz bilim berý qaýymdastyǵynyń múshesi Gúlhan Ótegenovanyń aitýynsha, 2026 jyldan bastap barlyq balabaqsha vaýcherlik júiege kóshken. Buryn qarjylandyrý bilim bólimderi arqyly júrgizilse, qazir bul mindet Qarjy ortalyǵyna júktelgen.
«2026 jyldan bastap barlyq balabaqsha vaýcherlik júiege kóshti. Buryn qarjylandyrý bilim bólimderi arqyly júrgizilse, qazir Qarjy ortalyǵy arqyly júzege asyrylady. Keibir balabaqshalar sáýir aiynan beri tólem alǵan joq. Bizge qarajat bólingenshe kútý qajet ekeni aitylyp otyr», – dedi ol.
Onyń sózinshe, birqatar mektepke deiingi uiymdar ai saiynǵy qarjylandyrýdy áli alǵan joq. Sonymen qatar qańtar jáne aqpan ailaryna qatysty bereshek te saqtalyp otyr.
Sondai-aq jekemenshik balabaqsha ókilderi 2026 jyldyń ekinshi jartyjyldyǵyna arnalǵan memlekettik sýbsidiialaý boiynsha qosymsha kelisimderge áli kúnge deiin qol qoiylmaǵanyn aitty. Olardyń pikirinshe, bul mekemelerdiń jumysyn josparlaýǵa jáne qyzmetkerlerdi saqtap qalýǵa kedergi keltirip otyr.
Atyraý oblystyq bilim basqarmasynyń basshysy Marat Ábýov vaýcherlik júie engizilgennen keiin qarjylandyrý Qarjy ortalyǵy arqyly júrgiziletinin rastady.
Onyń aitýynsha, qajetti qarajat tolyq kólemde qarastyrylǵan, al tólemderdiń keshigýi respýblikalyq deńgeidegi qarjylandyrý rásimine bailanysty. Biýdjet qarajaty bekitilgennen keiin barlyq tólemder aýdarylyp, alańdaýǵa negiz joq.
Bul másele Atyraý oblysy kásipkerler palatasy janyndaǵy Kásipkerlerdiń quqyqtaryn qorǵaý jáne sybailas jemqorlyqqa qarsy is-qimyl jónindegi keńeste de qaraldy. Talqylaý qorytyndysy boiynsha memlekettik organdar, «Atameken» UKP, salalyq qaýymdastyqtar jáne jekemenshik mektepke deiingi uiymdar ókilderiniń qatysýymen jumys tobyn qurý usynyldy.
