Atyraý oblysy Saǵyz aýylynda ulynan zábir kórgeni aitylǵan 89 jastaǵy tyl ardageri Ádilhan Sisenovtiń nemeresi Nurbaqyt Aqnietqyzy jelidegi paraqshasynda jańa video jariialady, dep habarlaidy dalanews.kz.
Nurbaqyt Aqnietqyzy áleýmettik jelidegi paraqshasynda atasymen birge túsken áserli sátin bólisip, qariianyń qazirgi jaǵdaiyna qatysty jazba jariialady.
"90 jyl… Tutas bir ǵasyrdyń kýási bolǵan júrek. Keshe ǵana bizge ómirdi úiretken jan búgin meniń qasymda otyryp, telefonnyń ár batyrmasyn baladai qyzyǵyp basyp otyr. "Mynany qalai ashady?", "Mynaý qaida ketedi?" degen ár suraǵynyń artynda sondai bir pák kóńil jatyr. Ár kúlkisiniń artynda úlken ómir bar", – dep jazdy ol.
Nemeresiniń aitýynsha, olar aýrýhanada otyrǵanymen, sol sátte ýaiym da, aýyr oi da umytylǵandai bolǵan. Tek ata men nemereniń birge kúlip, bir-birine jylý syilaǵan sáti ǵana qalǵan.
"Bir kezde ol meniń qolymnan ustap ómirge jeteledi. Búgin men onyń qolynan ustap, jańa dúnieni kórsetip otyrmyn. Ómirdiń eń ádemi zańy osy shyǵar", – deidi Nurbaqyt Aqnietqyzy.
Ol kópshilikke jaqyndarynyń qadirin ýaqytynda bilýge shaqyryp, qarapaiym sátterdiń keiin eń qymbat estelikke ainalatynyn jazdy.
"Sondyqtan búgin qushaqtap úlgereiik. Búgin tyńdap úlgereiik. Búgin birge kúlip úlgereiik. Óitkeni erteń bizge dál osy qarapaiym kóringen sátter ǵana eń qymbat estelik bolyp qalady. Atamnyń kúlkisi eshqashan óshpesin. Aq saqalynyń saiasy, batasy árdaiym tóbemizde bolsyn", – dep jazdy ol.
Buǵan deiin BAQ-ta 1937 jyly týǵan qariiany kenje uly uryp-soǵyp, úide skotchpen bailap tastaǵany týraly aqparat taraǵan edi. Kezinde sovhozda 40 jyl boiy basshylyq qyzmet atqarǵan aqsaqal qazir qalada turatyn nemeresiniń úiine kóshirilip, kútimge alynǵan.
