Sáýir aiynda Astana qalasynyń qylmystyq ister jónindegi mamandandyrylǵan aýdanaralyq soty «Astana banki» AQ direktorlar keńesiniń burynǵy tóraǵasy Oljas Tohtarovty 10 jylǵa bas bostandyǵynan aiyrdy. Sottyń sheshimi boiynsha, ol óz qaramaǵyndaǵylardyń kómegimen agenttik qyzmet túrinde aqsha jymqyrǵan jáne bank bankrotqa ushyrar aldynda Almatydaǵy biznes-ortalyqty zańsyz iemdenip alǵan, dep habarlaidy Dalanews.kz "Vremia" basylymyna siltep.
Sot úkimimen jalpy somasy shamamen 14 mlrd teńgeniń múlki tárkilendi. Olardyń qatarynda turǵyn jáne kommertsiialyq ǵimarattar, jer telimderi, baǵaly qaǵazdar men kriptovaliýta bar.
Erekshe nazardy «Jańa Rosa» JShS aktivteriniń tárkilenýi aýdardy - bul kompaniia Pavlodardaǵy 150 jyldyq tarihy bar syra zaýytyna ielik etedi. Kompaniia aktivteri 4,9 mlrd teńgege baǵalanǵan.
Is materialdaryna sáikes, buǵan deiin syra zaýyty «Rosa» AQ-ǵa tiesili bolǵan. Ol óz ýaqytynda «ATF Bank» AQ-nan nesie alǵan. Kompaniianyń sol kezdegi iesi - Oljas Tohtarovtyń ákesi, eks-depýtat Tanirbergen Tohtarov bolǵan. Alaida kásiporyn nesieni qaitara almai, bank múlikti aýktsionǵa qoiǵan.
Oljas Tohtarov zaýyttyń qaitadan óz otbasy ieligine ótýine kúsh salǵan. Ol bailanysy bar tulǵanyń atyna «Jańa Rosa» JShS-in tirkep, «Bank Astanadan» 1,8 mlrd teńge nesie alǵan. Bul qarajat aýktsionǵa qatysyp, ATF Bankten zaýyt múlkin satyp alýǵa jumsalǵan. Keiin kompaniia Tohtarovtyń týystarynyń atyna rásimdelgen.
Zaýytty onyń ákesi basqarǵan, al jańa kompaniianyń quryltaishysy bolyp Oljastyń nemere aǵasy - Fýat Satybaev tirkelgen. Basshylyq qyzmetterge burynǵy «Bank Astany» qyzmetkerleri otyrǵan.
Sotta:
«Zańsyz qabyldanǵan sheshimniń nátijesinde, banktiń 1,8 mlrd teńge mólsherindegi kredittik qarajaty Tohtarov O. tarapynan affilirlengen tulǵalar arqyly “Jańa Rosa” JShS-na tiesili syra zaýytyn satyp alýǵa jumsalǵan», – dep atap ótildi.
Qarjy naryǵyn retteý agenttiginiń málimetinshe, «Jańa Rosa» kompaniiasyna berilgen nesie birqatar óreskel zań buzýshylyqtarmen rásimdelgen: kompaniia jańa bolǵan, kepilzat bolmaǵan, nesieni alý sátinde tabystylyq kórsetkishi teris bolǵan. Bul - banktiń óziniń ishki erejelerine de qaishy bolǵan.
