Jıynǵa Premer-Mınıstr, quqyq qorǵaý, qorǵanys, qaýipsizdik jáne basqa da kúshtik qurylymdardyń basshylary qatysty.
Qasym-Jomart Toqaev Jambyl oblysynda bolǵan tótenshe oqıǵa saldarynan qaza tapqan azamattardyń otbasylaryna kóńil aıtyp, zardap shekken adamdardyń tezirek saýyǵyp ketýine tilektestik bildirdi.
– Keshe Jambyl oblysynyń Baızaq aýdanynda tótenshe oqıǵa boldy. Qarýly Kúshterimizdiń oq-dárisi saqtalatyn qoımanyń birinen órt shyqty. Artynan birneshe jarylys boldy. Jergilikti turǵyndar aman-esen. Ókinishke qaraı, áskerı qyzmetshiler men qutqarýshylar arasynda adam shyǵyny bar.
Olar qyzmettik mindetin atqarý barysynda erlikpen qaza tapty. Qaıtys bolǵan azamattardyń otbasyna qaıǵylaryna ortaqtasyp, kóńil aıtamyn. Jaraqat alǵan adamdardyń tezirek saýyǵyp ketýin tileımin, – dedi Memleket basshysy.
Prezıdent qaza tapqan azamattardyń otbasylaryna kómek kórsetý boıynsha naqty tapsyrmalar berdi.
– Memlekettik ýákiletti organdar qaza tapqan azamattardyń otbasylaryna kómek kórsetýdiń barlyq sharalaryn qabyldaýy qajet. Jumyldyrylǵan barlyq sala mamandarynyń jankeshtiliginiń arqasynda jaǵdaı baqylaýǵa alynyp, odan da kóp shyǵynǵa jol berilmedi. Qutqarýshylarǵa, dárigerlerge, polısıa, prokýratýra jáne ákimdik qyzmetkerlerine alǵys aıtamyn.
Degenmen órttiń saldary qıynǵa soqty. Adamdar zardap shekti. Kóptegen azamat baspanasyn tastap ketýge májbúr boldy. Eldi mekenderdiń ınfraqurylymyna zaqym kelip, birqatar ǵımarattar qırap qaldy. Osyǵan baılanysty shuǵyl sharalar qabyldandy. Biraq áli de kóp qalpyna keltirý jumystaryn júrgizý kerek, – dedi Qasym-Jomart Toqaev.
Prezıdent ortalyq jáne jergilikti organdardyń jumysyn durys úılestirý kerek ekenin aıtty. Qajetsiz kedergilerdi joıyp, ýaqyt uttyrmaı jedel qımylaýdy, eń birinshi kezekte aýyl turǵyndaryn óz úılerine qaıtarý sharalaryn qolǵa alýdy tapsyrdy.
Taǵy bir mańyzdy másele retinde apattyń sebepterin anyqtaý qajet ekenin aıtty. Bundaı jaǵdaılardyń aldyn alý boıynsha naqty sharalar qabyldaýdy tapsyrdy.
Memleket basshysy eki jyl buryn Arysta bolǵan jarylysty eske alyp, qarý-jaraq qoımalarynda áli de sheshilmegen túıindi máselelerdiń bar ekenin aıtty. Prezıdent Arys oqıǵasynan keıin arnaıy tapsyrma bergenin, endi osy baǵyttaǵy jumystardy jedeldetip aıaqtaýǵa tapsyrma berdi.
Qasym-Jomart Toqaev Jambyl oblysyndaǵy tótenshe oqıǵaǵa baılanysty birqatar sharalardy shuǵyl qolǵa alýdy tapsyrdy.
– Birinshi. Tótenshe jaǵdaıdyń saldaryn joıý úshin vedomstvoaralyq memlekettik komısıa qurylsyn. Oǵan Premer-Mınıstrdiń orynbasary Roman Vasılevıch Sklár basshylyq etsin. Roman Vasılevıch, sizge qazir jınalys aıaqtalǵan soń Jambyl óńirine shuǵyl barýdy tapsyramyn. Jumystyń basy-qasynda bolyp, barlyq sharalardy oqıǵa ornynan uıymdastyryńyz.
Ekinshi. Qaza bolǵan azamattardyń otbasyn áleýmettik qorǵaý jáne zardap shekken turǵyndarǵa kómek kórsetý úshin barlyq qajetti sharalar qabyldansyn.
Úshinshi. Densaýlyq saqtaý mınıstrligi tótenshe oqıǵa saldarynan jaraqat alǵan azamattarǵa jan-jaqty medısınalyq kómek kórsetýdi uıymdastyrsyn, – dedi Memleket basshysy.
Sondaı-aq Bas prokýratýra men İshki ister mınıstrligine oqys oqıǵanyń mán-jaıyn jáne kinálilerdi anyqtaý úshin sotqa deıingi tergeý amaldarynyń muqıat júrgizýdi qamtamasyz etýdi, İshki ister mınıstrligi múddeli memlekettik organdarmen birlesip, qoǵamdyq tártipti, azamattardyń qaýipsizdigi men dúnıe-múlkiniń saqtalýyn qamtamasyz etý úshin keshendi sharalar qabyldaýdy tapsyrdy.
Ulttyq qaýipsizdik komıtetine, Bas prokýratýraǵa jáne İshki ister mınıstrligi men múddeli memlekettik organdarǵa oqıǵa týraly jalǵan aqparattyń taralýyna jol bermeý úshin sharalar qabyldaý jóninde tapsyrmalar berildi.
Jıynda, Qorǵanys mınıstri Nurlan Ermekbaev, Tótenshe jaǵdaılar mınıstri Iýrıı Ilın, Jambyl oblysynyń ákimi Berdibek Saparbaev, İshki ister mınıstri Erlan Turǵymbaev jáne Bas prokýror Ǵızat Nurdáýletov baıandama jasady.
