Qazaqstan prezidenti Qasym-Jomart Toqaev pen Saýd Arabiiasynyń Taq murageri kelissóz júrgizdi.
Qasym-Jomart Toqaev Muhammed ben Salman ben Ábdelaziz Ál Saýdqa iltipat bildirip, shaqyrǵany jáne qonaqjailyq kórsetkeni úshin Saýd Arabiiasynyń koroli men Taq muragerine alǵys aitty.
Qazaqstan prezidentiniń aitýynsha, memleket basshysy retinde Saýd Arabiiasyna alǵash ret kelgendikten, bul sapardyń mańyzy zor.
Toqaev Saýd Arabiiasy Qazaqstannyń basty strategiialyq seriktesteriniń biri ekenin atap ótti.
"Saýd Arabiiasy – Qazaqstannyń táýelsizdigin birinshi bolyp moiyndaǵan elderdiń biri. Osy kezeńde túrli baǵyttaǵy yntymaqtastyǵymyz nyǵaia tústi. Qazir qazaq-saýd qatynastary joǵary deńgeide. Degenmen, eki el arasyndaǵy yntymaqtastyqqa tyń serpin beretin kez keldi. Bul – elderimizdiń múddesine sai keletin ortaq sheshim. Bizdiń ózara tiimdi bailanystarymyz nyǵaia beredi dep senemin", – dedi memleket basshysy.
Kelissóz barysynda saýda-ekonomikalyq jáne investitsiialyq yntymaqtastyq máseleleri talqylandy. Qazaqstan Saýd investorlary úshin ózara múddeni kózdeitin túrli perspektivti salalar boiynsha erekshe sharttar men keń kólemde artyqshylyqtar usynýǵa daiyn.
Taraptar ózara taýar ainalymyn edáýir arttyrýǵa nietti ekenin jáne jýyq arada eki el úkimetteriniń bul baǵyttaǵy jumystardy jandandyratynyn naqtylady.
Muhammed ben Salman ben Ábdelaziz Ál Saýd elderimiz arasyndaǵy qatynastar deńgeii jaqsy ekenin atap ótip, ony ári qarai nyǵaityp, damytý úshin múmkindikter mol ekenin aitty. Sondai-aq bul baǵyttaǵy jumystardy jandandyrý qajet ekenine toqtaldy. Onyń aitýynsha, bul rette Qazaqstan men Saýd Arabiiasynyń biznesmenderin biriktiretin Iskerlik keńestiń róli zor bolmaq.
Taq murageri memleket basshysynyń resmi sapary aiasynda ótetin Investitsiialyq dóńgelek ústelge Koroldiktiń iri kompaniialarynyń ókilderi qatysatynyn jetkizdi.
Onyń aitýynsha, qazirgi jaǵdaida Saýd Arabiiasynyń Memlekettik investitsiialyq qory úilestiretin birqatar joba boiynsha birlesken jumys mańyzdy sanalady.
Muhammed ben Salman ben Ábdelaziz Ál Saýd Koroldiktiń kompaniialary Qazaqstannyń agrarlyq salasyna investitsiia salýǵa qyzyǵýshylyq tanytyp otyrǵanyn aitty. Onyń pikirinshe, bul baǵyt jahandyq azyq-túlik daǵdarysy jaǵdaiynda asa ózekti bola túsedi.
Qasym-Jomart Toqaev Taq muragerin Qazaqstanǵa memlekettik saparmen kelýge shaqyrdy.
Muhammed ben Salman bul shaqyrýdy qýana qabyldaitynyn aityp, qol jetkizilgen ýaǵdalastyqtardy júzege asyrýdyń naqty nátijelerin talqylaý úshin Qazaqstanǵa saparmen kelýge daiyn ekenin jetkizdi.
Eske salsaq, memleket basshysy Qasym-Jomart Toqaev keshe, 23 shildede Saýd Arabiiasynyń koroli Salman ben Ábdelaziz Ál Saýdtyń shaqyrýymen Djidda qalasyna resmi saparmen bardy.
