Aqtóbe oblysynda ýaqytsha ustaý izoliatorynan qashyp ketken 33 jastaǵy er adam sol kúni qaita ustaldy, dep habarlaidy dalanews.kz.
«Diapazon» basylymynyń málimetinshe, er adam kólikti mas kúiinde basqarǵany úshin sottalǵan. Onyń ústine ol rólge júrgizýshi kýáliginen aiyrylǵanyna qaramastan otyrǵan. Sot úkiminen keiin birneshe kún ótken soń ol Badamsha aýylyndaǵy ýaqytsha ustaý izoliatorynan qashýǵa áreket jasaǵan.
Tergeý málimetinshe, keshki serýen kezinde ol aspaly qulypty ashyp, kórshi aýlaǵa ótken. Keiin qabyrǵadan shyǵyp turǵan ulýtas bóligin syndyryp, temir armatýrany maiystyrǵan soń ǵimarattyń shatyryna kóterilgen. Odan ári tikenekti symnan asyp túsip, izoliator aýmaǵynan shyǵyp ketken.
Er adam jaiaý júrip Kempirsai aýylyn ainalyp ótkennen keiin Aqtóbe qalasyna qarai ketip bara jatqan kólikke otyrǵan. Alaida dittegen jerine jete almai, sol kúni politsiia qyzmetkerleriniń qolyna tústi. Sot onyń qashyp ketkeni úshin 1,5 jyl bas bostandyǵynan aiyrý jazasyn taǵaiyndady. Buǵan deiingi ótelmegen jaza merzimi qosylyp, jalpy jaza merzimi 2 jyl bolyp belgilendi.
Endi ol jazasyn jalpy rejimdegi koloniiada emes, qaýipsizdigi eń joǵary túzeý mekemesinde óteitin bolady.
