18 aqpanda Saýd Arabiiasynda AQSh pen Resei delegatsiialary arasynda Ýkrainadaǵy jaǵdaidy retteý boiynsha kelissózder bastaldy, dep habarlaidy Dalanews.kz.
Bul — sońǵy birneshe jyldaǵy Máskeý men Vashington arasyndaǵy alǵashqy aýqymdy kezdesý.
Reseilik tikelei investitsiialar qorynyń (RFPI) bas direktory Kirill Dmitriev kelissózderge qatysyp, ekonomikalyq máseleler boiynsha jaýapty bolatynyn málimdedi.
Kezdesýde Saýd Arabiiasyn syrtqy ister ministri Feisal ben Farhan Al Saýd pen ulttyq qaýipsizdik jónindegi keńesshi Mýsaid ben Muhammed Al-Aiban ókildik etýde, dep jazady RBK.
Kirill Dmitrievtiń aitýynsha, reseilik delegatsiia amerikalyq tarapqa saýda-ekonomikalyq yntymaqtastyqty damytý boiynsha birneshe usynys jasaǵan. Ol naqty qandai usynystar týraly sóz bolǵanyn ashyp aitpady, biraq Resei men AQSh-tyń Arktikada birlesken jobalar júrgizýge múmkindigi baryn atap ótti.
Bul kelissózder Ýkrainadaǵy soǵys jaǵdaiynyń ýshyǵýyna jáne halyqaralyq qaýymdastyqtyń qaqtyǵysty toqtatýǵa baǵyttalǵan qysymynyń kúsheiýine tuspa-tus kelip otyr.
Aita keterligi, buǵan deiin Ýkraina prezidenti Vladimir Zelenskii AQSh qorǵanys ministri Pit Hegset pen Donald Tramp ákimshiliginiń basqa da ókilderiniń Ýkrainadaǵy soǵys jaǵdaiy týraly málimdemelerin synǵa alǵan bolatyn.
