Qazaqstan AQSh ákimshiligi Qytaidan keletin taýarlarǵa salynatyn baj salyǵyn úshinshi elder arqyly ainalyp ótý táýekeli bar memleketter qatarynda ataǵan elder tizimine kirdi, dep habarlaidy dalanews.kz.
AQSh ákimshiligi jariialaǵan «The Great Transshipment Scam» qujatynda Qytaidan shyqqan taýarlardyń joǵary tarifterdi ainalyp ótý úshin bajy tómen elder arqyly AQSh naryǵyna jetkizilýi múmkin ekeni aitylǵan.
Qujatta mundai shemalarda taýarlardy qaita qaptaý, tańbalaý, shot-faktýralardy ózgertý, ónimge shamaly óńdeý júrgizý nemese onyń shyqqan elin qate kórsetý siiaqty tásilder qoldanylýy múmkin ekeni kórsetilgen. Sonymen qatar AQSh tarapy saýda baǵyttarynyń ózgerýi árdaiym zańsyz áreketti bildirmeitinin, oǵan óndiris pen investitsiialardyń aýysýy, sondai-aq jahandyq jetkizý tizbekterindegi ózgerister de sebep bolýy múmkin ekenin atap ótken.
Aq úidiń málimetinshe, boljamdy shemalarǵa qatysy bolýy múmkin 40-tan astam memleket pen ekonomika qujatqa engizilgen. AQSh ákimshiliginiń baǵalaýynsha, mundai yqtimal qaita tieý operatsiialarynyń kólemi esepteý ádisine qarai jylyna $40 mlrd-tan $303 mlrd-qa deiin jetýi múmkin.
Qazaqstan, Ázerbaijan, Grýziia jáne Ózbekstan qujatta Tier III sanatyna engizilgen. Bul sanatqa boljamdy qaita tieý kólemi salystyrmaly túrde tómen, alaida saýda baǵyttaryn ózgertý úshin belgili bir múmkindikteri bar shaǵyn ekonomikalar jatqyzylǵan.
Qujatta mundai táýekel faktorlary retinde arzan jumys kúshi, erkin ekonomikalyq aimaqtar, shekaralar men porttarǵa qoljetimdilik, keden qoimalary, arnaiy qurastyrý óndiristeri jáne kedendik baqylaýdyń shekteýli bolýy atalady.
Alaida AQSh qujatynda Qazaqstanǵa qatysty naqty kompaniialar, operatsiialar nemese Qytai taýarlaryn AQSh-qa zańsyz qaita eksporttaý jaǵdailary kórsetilmegen. Sondai-aq Qazaqstannyń boljamdy shemadaǵy naqty róli egjei-tegjeili sipattalmaǵan.
Qazaqstannyń tizimge engizilýi eldiń halyqaralyq kólik-logistikalyq baǵyttardaǵy róliniń artýy aiasynda qaralyp otyr. Qazaqstan Qytai men Eýropany bailanystyratyn saýda baǵyttaryna, sonyń ishinde Orta dálizge qatysady.
Qazirgi ýaqytta Qazaqstannyń Tier III sanatyna engizilýine bailanysty qandai da bir naqty sanktsiia nemese qosymsha baj engiziletini týraly aqparat joq. AQSh ákimshiligi yqtimal tariftik ainalyp ótý shemalaryn baqylaý úshin jasandy intellekt negizindegi America’s Detective Border júiesin engizýdi usynǵan.
