Aqmola oblysynda kókpar oiyny kezinde 13 jastaǵy Dinmuhammedtiń qaza bolýyna bailanysty qozǵalǵan qylmystyq is toqtatyldy. Tergeý organdary bolǵan jaǵdaidy jazataiym oqiǵa dep tanyp, is materialdarynan qylmystyq quqyqbuzýshylyq quramyn anyqtamaǵan. Alaida marqumnyń týystary bul sheshimmen kelispei otyr, dep habarlaidy dalanews.kz.
Halyqstan málimetinshe, aiǵyly oqiǵa 26 mamyrda Tselinograd aýdanyna qarasty Qabanbai batyr aýylynda bolǵan. Sol kúni Dinmuhammed kókpar jattyǵýyna barǵan.
Týystarynyń aitýynsha, oiyn kezinde jasóspirim qarsylas komandaǵa serkeni bermeýge tyrysqan. Osy sátte qarsylas oiynshylardyń biri qatty jyldamdyqpen kelip, onyń atyna búiirinen soǵylǵan. Soqtyǵys saldarynan Dinmuhammed jerge qulap, aýyr jaǵdaida aýrýhanaǵa jetkizilgen. Alaida dárigerler onyń ómirin saqtap qala almady.
Marqumnyń týystary balanyń ólimine jai ǵana attan qulaý sebep boldy degen nusqaǵa kúmán keltiredi. Dinmuhammedtiń tátesiniń málimdeýinshe, sot-meditsinalyq saraptama qorytyndysynda densaýlyqqa aýyr ziian "qatty doǵal zattardyń áserinen" keltirilgeni jazylǵan. Alaida jaraqattardyń attan qulaý saldarynan bolǵany kórsetilmegen.
"Balanyń basynan aýyr jaraqat alǵan, julyny zaqymdanyp, moiny synǵan. Attan qulaǵan kezde osyndai jaraqat alýy múmkin be? Qulap bara jatqan adam instinktivti túrde qorǵanyp, denesin jinaýǵa tyrysady. Biz attan qulady degen nusqaǵa senbeimiz. Suraǵymyz óte kóp, biraq eshkim jaýap bermei otyr", - dep jazdy marqumnyń tátesi Threads paraqshasynda.
Týystary Dinmuhammed ómirge qaýipti jaraqattardy er-toqymda otyrǵan kezinde, qarsylas oiynshynyń soqqysynan aldy dep esepteidi. Olardyń sózinshe, aýdandyq politsiia bólimi men oblystyq prokýratýra adam ólimi deregi boiynsha qylmystyq is qozǵaǵanymen, shamamen eki aidan keiin tergeý toqtatylǵan.
Marqumnyń jaqyndary oiyn kezinde bolǵan soqtyǵystyń mán-jaiy tolyq zerttelmedi dep sanaidy. Olar istiń nelikten qysqa merzim ishinde jabylǵanyn jáne oqiǵanyń qandai dálelder negizinde jazataiym jaǵdai retinde baǵalanǵanyn túsindirýdi talap etip otyr.
