Astana qalasynyń qylmystyq ister jónindegi aýdanaralyq soty ánshi Sivi Mahmýdidiń burynǵy kúieýi — Ańsar Qajmuhanulyna qatysty úkim shyǵardy. Ol asa iri mólsherde jasalǵan alaiaqtyq boiynsha aiypty dep tanylyp, 5 jylǵa bas bostandyǵynan aiyryldy, dep habarlaidy Dalanews.kz.
Is mán-jaiy
Sot materialdaryna súiensek, sottalýshy K. jábirlenýshi A.-nyń týysy ótkizý maqsatynda asa iri mólsherde psihotroptyq zattardy zańsyz saqtaý faktisi boiynsha qylmystyq jaýapkershilikke tartylatynyn, onyń tergeý izoliatoryna qamalǵanyn bilip, politsiia qyzmetkerleriniń arasynda is júzinde tanystary joq bola tura, qalyptasqan jaǵdaidy paidalanyp, áreketin aýyrdan neǵurlym jeńil jazaǵa saralaý máselesin sheshý úshin politsiia qyzmetkerlerine beremin dep jalǵan aityp, alaiaqtyq jolymen A. jáne onyń týystarynyń 50 myń AQSh dollary somasyndaǵy aqsha qarajatyn jymqyrǵan.
“Osylaisha, K. jábirlenýshilerge asa iri mólsherde materialdyq zalal keltirgen.
Sottalýshynyń kinási kýálardyń aiǵaqtarymen, bettestirý hattamasymen, sot-psihologiialyq-filologiialyq saraptamanyń qorytyndysymen dáleldendi”, — delingen sot habarlamasynda.
Taraptardyń ustanymy
Memlekettik aiyptaýshy K.-ny 5 jylǵa bas bostandyǵynan aiyrýdy surasa, qorǵaýshy tarap onyń kámeletke tolmaǵan balalary baryn jáne jasaǵan isine ókinetinin eskere otyryp, jazany jeńildetýdi suraǵan.
Sot sheshimi
QK-niń 190-baby 4-bóliginiń sanktsiiasy múlki tárkilenip, belgili bir laýazymdardy atqarý nemese belgili bir qyzmetpen ainalysý quqyǵynan 10 jylǵa deiingi merzimge aiyra otyryp nemese onsyz, 5-ten 10 jylǵa deiingi merzimge bas bostandyǵynan aiyrý jazasyn kózdeidi.
Sot úkimimen:
–Sot úkimimen K. QK-niń 190-baby 4-bóliginiń 2) tarmaǵynda kózdelgen qylmystyq quqyq buzýshylyq jasaǵany úshin kináli dep tanylyp, 5 jyl merzimge bas bostandyǵynan aiyrýǵa sottaldy.
– Aiyptalýshynyń kishkentai balalarynyń bolýy, kinásin moiyndap, shyn júrekten ókinýi – jazany jeńildetetin mán-jailar retinde eskerildi;
– Aýyrlatatyn mán-jailar anyqtalǵan joq.
Úkim zańdy kúshine engen joq.
Isti Astana qalasynyń qylmystyq ister jónindegi aýdanaralyq soty, sýdia – Jumaksanov Eldos qarady.
