Kezdesýge qatysýshylarǵa arnaǵan sózinde oblys ákimi A. Batalov:
– Qurmetti analar, aiaýly arýlar! Erekshe mereke 8 Naýryz qarsańynda ózderińizben júzdesip otyrǵanyma qýanyshtymyn. Tabiǵat Áiel-Anaǵa sulýlyq pen aqyldy, meiirim men tózimdilikti molynan bergen. Osyndai izgi qasietterińizdiń arqasynda árqaisylaryńyz oshaqtyń otyn mazdatyp, otbasynyń berekesin arttyryp, baqytyn eselep otyrsyzdar. Shańyraq jaýapkershiligimen qosa, qoǵamda da óz úni, óz orny bar myqty maman, isker azamat retinde elimizdiń ósip-órkendeýine zor úles qosyp kelesizder. Sizderge osy orasan eńbekterińiz ben erik-jigerlerińiz úshin shynaiy rizashylyǵymyzdy bildiremiz. Otbasylaryńyzda árqashan qýanysh, baqyt, yrys pen yntymaq ornap, barlyq arman-maqsattaryńyz oryndalsyn! – dedi.
Munan keiin saltanatty jiyn marapattaýmen jalǵasty. Oblys basshysy kópbalaly analardy Altyn alqamen, Kúmis alqamen nagradtap, birqatar áiel azamatshalarǵa meditsinadaǵy, bilim berýdegi, sporttaǵy, biznestegi, jýrnalistikadaǵy jáne basqa da mańyzdy salalardaǵy jemisti eńbegi úshin oblys ákiminiń Qurmet gramotasymen, alǵys hatymen marapattady.
Óz kezeginde áielder kórsetilgen qoshamet úshin rizashylyǵyn bildirdi. Olardyń qatarynda I. Jansúgirov atyndaǵy JMÝ-dyń prorektory Lázzat Erkinbaeva, «Shyǵys ken basqarmasy» JShS-nyń direktory Zelina Katranova, oblystyq qorǵanys isteri jónindegi departamenti baspasóz qyzmetiniń bastyǵy Janar Amerjanova, nemis etnomádeni birlestiginiń belsendisi, Talǵar aýdandyq máslihatynyń depýtaty Svetlana Almabekova, Súiinbai atyndaǵy Almaty oblystyq filarmoniianyń ánshisi Ásem Sembina da bar. Olar óz sózinde oblystyń damýyn, sonyń ishinde Taldyqorǵannyń sáýlettik keipiniń erekshelene bastaǵanyn tilge tiek etti.
Kezdesý sońynda mýzykalyq syilyq retinde án shyrqaldy.
Almaty oblysy ákiminiń baspasóz qyzmeti
