Quramynda 10 múshesi bar «Saryarqa» pikirtalas klýby Qaraǵandydaǵy kóshe attarynyń ózgerýine qarsylyq bildirdi. Pikirtalas klýbynyń múshesi Iýrii Mirzoev Qaraǵandy oblysynyń ákimi N.Ábdibekovtyń Á.Bókeihanovtyń atyn Oktiabr aýdanyna berý týraly usynysyna qarsymyn deidi.
Búgin «Saryarqa» pikirtalas klýbynyń músheleri jinalyp, kóshe attarynyń ǵana emes Oktiabr aýdanynyń Álihan Bókeihanovtyń atymen atalýyna da qarsylyq bildirdi. Quramynda onshaqty múshesi bar klýbtyń tek 3-ýi ǵana qatysqan jinalysqa sonymen qatar qala turǵyndary, tarihshylar atsalysty. Pikirleri qarama-qarsy eki top kóshe attarynyń ózgerýiniń durys ne burystyǵyn dáleldemekshi bolyp qyryq pyshaq boldy.
«Kóshe attaryn ózgertýge ketken qarjy odan da turǵyndardyń áleýmettik máselelerin sheshýge jumsalsyn degen pikirdemin. Zeinetkerlerdiń zeinetaqasy shailyǵyna jetpeitin ýaqytta qanshama qarjy jumsap, kóshe attaryn ózgertý durys emes. Qaraǵandy oblysynyń ákimi N.Ábdibekovtyń Á.Bókeihanovtyń atyn Oktiabr aýdanyna berý týraly usynysyna qarsymyn», - deidi qoǵam belsendisi Iu.Mirzoev.
«Álihannyń atyn Oktiabr aýdanyna berý qajet dep sanaimyn. El basyna kún týǵan 1937 jyly qazaq halqynyń, osy aimaqtyń bolashaǵyn oilaǵan 25 myńǵa tarta azamatyn atyp tastady. Onyń ishindegi basshysy osy Álihan Bókeihanov bolatyn. Al «Oktiabr» bizge ne ákeldi?», - deidi qala turǵyny Jeksen Ábdirahmanov.
Jinalǵandardyń kópshiliginiń tarihty tolyqtai bilmeitindigin baiqadyq. Olar tipti qaladaǵy «Asfaltnaia», «Prikanalnaia» siiaqty kóshelerdiń de atyn ózgertýge qarsylyq bildirýde.
«Bul bizdiń tarih. Kóshelerdiń aty ózgermesin. Oktiabr aýdanynyń da atyn ózgertýge qarsymyz. Álihan da Máskeýge, Leninge barǵan eken. Sonda ol da kommýnist bolǵan shyǵar. Onda nesine ózgertemiz. Osy kommýnistik ataýlar tura bersin», - deidi Oktiabr aýdanynyń turǵyny Lidiia Margacheva.
