Reseidiń Altai Respýblikasynda týrist áielge aiý shabýyl jasaǵannan keiin ańshylar eki kún ishinde 12 aiýdy atyp óltirdi, dep habarlaidy dalanews.kz.
Oqiǵa Týrochak aýdanynda bolǵan. Sársenbige qaraǵan túni Artybash aýyly mańynda aiý týrister turǵan shatyrǵa shabýyl jasap, Novosibirden kelgen áieldi ormanǵa súirep áketken. Áiel qaza tapqan.
Qazir ańshylar Artybash, Iogach aýyldary men jaqyn aýmaqtarda aiýlardy baqylap, sanyn rettep jatyr. Mamandardyń boljamynsha, atylǵan aiýlardyń biri týrist áielge shabýyl jasaǵan jyrtqysh bolýy múmkin.
Jabaiy janýarlardyń qozǵalysyn respýblikalyq ushqyshsyz apparattar ortalyǵynyń drondary áýeden baqylap otyr. Aiýlardyń sanyn retteý jumystary jalǵasady.
Osy oqiǵadan keiin aýdanda joǵary daiyndyq rejimi engizildi. Turǵyndar men týrister túngi ýaqytta, iaǵni 20:00-den 10:00-ge deiin júrýine shekteý qoiyldy.
Eske salaiyq, buǵan deiin Altaida jabaiy aiý 29 jastaǵy qyzdy bólshektep tastaǵany habarlandy. Tótenshe jaǵdailar qyzmetindegi derekkózdiń aitýynsha, aiý áieldi shatyrdan súirep shyǵaryp, ormanǵa alyp ketken. Jyrtqysh oǵan aýyr jaraqat salyp, denesin kómip tastaýǵa áreket jasaǵan. Jergilikti turǵyndar kómek kórsetýge tyrysqanymen, aiý olarǵa da tap bergen.
Kýágerlerdiń sózinshe, jyrtqysh tipti atylǵan oqtan da qoryqpaǵan. Oqiǵa ornyna kelgen politseiler aiýǵa emes, aýaǵa oq atqan.
