Almatydaǵy Ádi Sháripov kóshesinde ornalasqan 13 qabatty turǵyn úi kesheninde bolǵan órt kezinde bir áiel qaza tapty. Oqiǵa ornynan 148 adam, onyń ishinde toǵyz bala qutqaryldy, dep habarlaidy dalanews.kz.
23 tamyz kúni saǵat 22:49-da «101» pýltine Ádi Sháripov kóshesi, 145 mekenjaiyndaǵy turǵyn úi kesheninde órt shyqqany týraly habar túsken. Alǵashqy órt sóndirý bólimsheleri bes minýt ishinde oqiǵa ornyna jetken.
Qutqarýshylar kelgen kezde ekinshi kireberistiń tehnikalyq bólmesi men qabattaryndaǵy kabelder, sondai-aq birinshi kireberistiń 7-13 qabattaryndaǵy elektr qalqandary janyp jatqanyn anyqtaǵan.
Jedel júrgizilgen jumystardyń nátijesinde órt saǵat 23:57-de oqshaýlanyp, 00:14-te tolyq sóndirilgen.
Qutqarýshylar arnaiy tynys alý apparattary men qutqarý qalpaqtaryn paidalanyp, baspaldaq arqyly ǵimarattan 148 adamdy, onyń ishinde toǵyz balany shyǵarǵan. Tórt adam aýrýhanaǵa jetkizildi.
Zardap shekkenderdiń biri ǵimarat ishinen es-tússiz kúide tabylǵan. Oqiǵa ornyna kelgen meditsina qyzmetkerleri reanimatsiialyq sharalar júrgizgenimen, áieldiń ómirin saqtap qalý múmkin bolmaǵan.
Órtti sóndirýge Tótenshe jaǵdailar departamentiniń shamamen 90 qyzmetkeri men 25 arnaiy tehnikasy jumyldyryldy.
TJD málimetinshe, órttiń órshýine órt týraly habardyń kesh túsýi sebep bolýy múmkin. Turǵyndardyń aldyn ala málimeti boiynsha, avtomatty órt dabyly órt sóndirý bólimshelerine qońyraý shalynǵanǵa deiin shamamen bir jarym saǵat buryn iske qosylǵan. Alaida osy aralyqta órtke qarsy qyzmetke tiisti habarlama túspegen.
Buǵan deiin órt-tehnikalyq tekserý barysynda anyqtalǵan órt qaýipsizdigi talaptarynyń buzýshylyqtaryn joiý jóninde jaýapty tulǵalarǵa nusqama berilgen.
Qazirgi ýaqytta órttiń naqty shyǵý sebebi anyqtalyp jatyr.
