Jańa oqý jylynyń basyna taman Almatyda stýdentterge arnap jataqhanada, hostelde, qonaq úi men joǵary oqý ornynyń qaita jabdyqtalǵan ǵimaratynda jalpy sany 61,2 myń oryn daiyndap qoiady. Sońǵy bir jylda stýdenttik jataqhanadaǵy oryn tapshylyǵy 23,7 myńnan 5,7 myńǵa deiin, iaǵni shamamen tórt esege qysqardy. Óńirlik kommýnikatsiialar qyzmetinde ótken brifingte Almatynyń jastar saiasaty basqarmasynyń basshysy Aziz Qajdenbek qalaǵa basqa óńirden keletin stýdentterdi ornalastyrýǵa qalai qam jasap jatqandaryn aityp berdi, dep habarlaidy dalanews.kz.
Almaty elimizdegi eń úlken bilim beretin ortalyq. Qazir qaladaǵy 35 joǵary oqý ornynda 221 myń stýdent bilim alyp jatyr. Onyń 149 myńy basqa óńirden kelgen. Baspanaǵa da osy sanattaǵy stýdentter kóbirek muqtaj.
Aziz Qajdenbektiń aitýynsha, stýdenttik turǵyn úige de suranys artqan. Biyl 30 094 memlekettik bilim berý granty bólinipti. Bul byltyrǵymen salystyrǵanda 700-ge, 2024 jylmen salystyrǵanda 1 600-ge kóp. Sonymen qatar joǵary oqý ornynyń aqyly bólimine qujat qabyldaý 28 tamyzǵa deiin jalǵasatyndyqtan, stýdentterdiń naqty sany áli naqtylanyp jatyr.
«Biz qazirdiń ózinde yqtimal suranysty eskere otyryp, daiyndyq jumysyn júrgizip jatyrmyz. Sońǵy bir jylda jataqhana ornynyń tapshylyǵy edáýir azaidy. 2025 jyly 23,7 myń oryn tapshy bolsa, biyl bul kórsetkish 5,7 myńǵa deiin tómendep, tórt esedei azaiyp otyr, – deidi Aziz Qajdenbek.
Tapshylyqtyń azaiýyna birneshe jaǵdai áser etken. 47 myńdai túlek jataqhanadaǵy ornyn bosatyp, grantty qaita bólipti. Sonymen qatar qalada jańa stýdentter úii de ashyla bastady. Qazir Almatyda 136 stýdenttik jataqhana jumys isteidi. Onyń 43-i 2023 jyldan beri paidalanýǵa berilgen. Byltyr rekordtyq kórsetkishke – 4,5 myń tósek-orynǵa qol jetkizipti. Qazir jataqhanada 46,2 myń stýdent turady. Bul byltyrǵydan 6 myńǵa kóp.
Jyldyń sońyna deiin qalada taǵy 4 658 orynǵa arnalǵan 13 nysan ashylmaqshy. 287 oryndyq eki jataqhana qaita jańǵyrtýdan keiin paidalanýǵa beriledi. 4 371 stýdentke arnalǵan taǵy 11 jańa ǵimarat bar arasynda. Sonymen qatar qala balama turǵyn úi qoryn da keńeitip jatyr. Hostelder men qonaq úide stýdentterge qazirdiń ózinde 11 myń oryn qarastyrylǵan. Bir jyl buryn bul kórsetkish 9 myń oryn bolypty.
Qosymsha qordy ýniversitetterdiń ózi de izdestirip jatyr. Bos turǵan ákimshilik ǵimarattar men basqa da nysandardy stýdentterge arnap qaita beiimdei bastady. Osy arqyly taǵy 4 myń oryn daiyndaý josparlanǵan.
«1 qyrkúiekke deiin Almatyda barlyǵy 61,2 myń oryn daiyn bolady. Bul – jataqhanalar, hostelder, qonaqúiler men joǵary oqý oryndarynyń ishki rezervteri. Biyl stýdentterge usyna alatyn jalpy turǵyn úi qory – osy», – dedi jastar saiasaty basqarmasy basshysy.
Jańa jataqhana salýdyń taǵy bir baǵyty – investorlar tartý. 2023 jyldan bastap ákimdik bastamasymen Almatyda jobalyq keńse jumys isteidi. Onyń mamandary investorlarǵa qoldaý kórsetip, ruqsat beretin qujattaryn rásimdeýge, stýdenttik jataqhana salýǵa beriletin nesieler boiynsha paiyzdyq mólsherlemeni sýbsidiialaý tetigin túsindirýge kómektesedi.
Jappai ornalasar kezde qalada konsýltatsiialyq ortalyqtyń da jumysy kúsheidi. 10 tamyzdan bastap Qazaq ulttyq qyzdar pedagogikalyq ýniversitetiniń bazasynda, Bógenbai batyr kóshesi, 142 mekenjaiynda sitýatsiialyq ortalyq jumys isteidi. Onyń janynda táýlik boiy isteitin koll-ortalyq bar. Oǵan táýligine 1,5 myńnan astam qońyraý túsedi. Keńes alý úshin myna nómirge habarlasyńyz: +7 700 950 95 28, +7 727 237 01 70.
Stýdentterge qai jerde ornalasýǵa bolatyny, jataqhanaǵa qalai ótinish berý kerektigi, oryn berilmegen jaǵdaida ne isteý qajet ekeni jáne qiyn jaǵdaida qaida júginý kerektigin túsindiredi. Osyndai ortalyqtar Almatydaǵy barlyq joǵary oqý ornynyń janynda jumys isteidi.
Taǵy bir shara – qonystaný kúnderi qandai da bir sebeppen baspanasyz qalǵan stýdentterge ýaqytsha turǵyn úi usyný. 22 tamyzda ALT University-diń №1 Stýdentter úiinde, Maýlenov kóshesi, 108A mekenjaiynda 50 oryndyq Daǵdarys ortalyǵy ashylady.
«Eger stýdent qonystaný kúni qandai da bir sebeppen baspanasyz qalsa, biz ony jalǵyz qaldyrmaimyz. Ony ýaqytsha ornalastyryp, keiin turaqty turatyn jer tabýǵa kómektesemiz», – dep atap ótti Aziz Qajdenbek.
Stýdentterdi jataqhanaǵa ornalastyrý 25 tamyzda, joǵary oqý ornyndaǵy oqý protsesi 1 qyrkúiekte bastalady. Osy kezeńde qalanyń barlyq jaýapty qyzmeti kúsheitilgen jumys rejimine kóshedi. Sonymen qatar qalada bos oryndardyń sany ǵana emes, stýdentterdiń jatyn jeri de baqylaýda bolady. Jataqhanany jyl saiyn eki kezeń boiynsha qoǵamdyq uiymdardyń ókilderi, depýtattar, úkimettik emes uiymdar men eriktiler tekserip turady.
Biyl baqylaýdyń birinshi kezeńi 30 maýsym men 3 shilde aralyǵynda ótti. Tekserý qorytyndysy boiynsha bólmedegi ylǵaldylyq, jihazdyń tozýy, sanitarlyq-gigienalyq jaǵdai, sý men santehnikanyń aqaýy, tereze men esiktiń jai-kúii, sondai-aq abattandyrý men jataqhanany kútip ustaý siiaqty alty negizgi másele anyqtalypty.
Ár eskertý boiynsha joǵary oqý ornyna tiisti usynys berildi. Qazirgi ýaqytta anyqtalǵan kemshilikter bekitilgen kestege sáikes joiylyp jatyr.
Tekserýdiń ekinshi kezeńi 18-25 tamyz aralyǵynda óti jatyr. Mamandar buǵan deiin anyqtalǵan kemshiliktiń joiylǵan-joiylmaǵanyn tekserip, jataqhananyń jańa oqý jylyna daiyndyǵyna qorytyndy jasaidy.
«Biz qajetti oryn sanyn qamtamasyz etip qana qoimai, stýdentterdiń jatyn jeri qanadi ekenine de qaraimyz. Jataqhanalardyń jaǵdaiyna qatysty birde-bir eskertý nazardan tys qalmaidy», – dedi spiker.
Jastar saiasaty basqarmasynyń málimetinshe, qazirgi tańda Almatydaǵy stýdentterdi ornalastyrý jaǵyn baqylaýda ustap otyr. Qala biligi biylǵy oqý jylyndaǵy qajettilikti tolyq qamtamasyz etip qana qoimai, aldaǵy jyldary stýdentter sany men turǵyn úige degen suranystyń ósýin aldyn ala eskerýge múmkindik beretin júie qalyptastyrýdy josparlap otyr.
«1 qyrkúiekke deiin barlyq qajetti sharany qabyldap, basqa óńirden kelgen baspanaǵa muqtaj ár stýdenttiń qoljetimdi ári jaily turǵyn úige qol jetkizýin qamtamasyz etý mindetimiz», – dep túiindedi Aziz Qajdenbek.
