Búgin Almatydaǵy Bostandyq aýdandyq sotynda jýrnalist Gúlnar Bajkenovaǵa qatysty qylmystyq is boiynsha basty sot talqylaýy ótip jatyr. Isti sýdia Elena Kvan qarap jatyr. Memlekettik aiyptaýshy sotta aiyptaý aktisin oqyp, taraptar alǵashqy protsessýaldyq ustanymdaryn jariialady, dep habarlaidy dalanews.kz.
Sot otyrysynyń basynda qorǵaýshy Olga Kim birneshe ótinishhat joldap, tergeý barysynda birqatar zańbuzýshylyqtarǵa jol berilgenin málimdedi. Qorǵaý tarapynyń ýájinshe, jeti aiǵa sozylǵan tergeý barysynda 18 tomdyq qylmystyq is jinalǵanymen, Bajkenovadan nebári eki ret, árqaisysy shamamen 15 minýttan ǵana jaýap alynǵan.
Óz kezeginde Gúlnára Bajkenova ózine taǵylǵan aiyptardy moiyndamaitynyn aitty.
“Jeti aidyń ishinde 18 tom qylmystyq is jinaldy. Biraq meni bar bolǵany eki ret qana jaýapqa shaqyrdy. Ár jaýap alý shamamen 15 minýtqa ǵana sozyldy”, – dedi ol.
Sondai-aq sottalýshy aqsha aýdarymdaryna qatysty túsinikteme berip, qarajatty zańsyz iemdenbegenin jetkizdi.
Bajkenovanyń aitýynsha, keńseden tabylǵan aqshanyń bir bóligi qyzmetkerlerdiń qarasha aiyndaǵy jalaqysyn tóleýge arnalǵan.
“Býhgalterdiń janynan tabylǵan aqsha qyzmetkerlerdiń jalaqysyna arnalǵan edi. Ol kezde 1 jeltoqsan bolatyn, biz qarasha aiynyń eńbekaqysyn tóleýge daiyndalyp jatqanbyz”, – dedi ol.
Sondai-aq jýrnalist kabineti men páterinen alynǵan qarajattyń ózine tiesili ekenin aityp, onyń páterdi jóndeý jumystaryna jumsalýy tiis bolǵanyn jetkizdi.
“Kabinetimdegi aqsha da, úiimnen alynǵan aqsha da – ózimniń jeke qarajatym. Páter jóndeý jumystarymen ainalysyp júrgendikten, ol aqsha únemi ózimde bolatyn. Tergeý kezinde onyń qaidan kelgenin tolyq túsindirdim. Tekserý nátijesinde qarajattyń zańdy tabys ekeni rastaldy. Onyń “Ordaǵa” da, qylmystyq is boiynsha qaralyp jatqan birde-bir epizodqa da qatysy joq. Bul – óz eńbegimmen tapqan jeke qarajatym”, – dedi Bajkenova.
Budan bólek, Bajkenova zańsyz kásipkerlik týraly aiyppen de kelispeitinin málimdedi. Onyń sózinshe, is materialdarynda kórsetilgen jyljymaityn múlik mámileleri kásipkerlik qyzmetke emes, jeke turǵyn úiine qatysty bolǵan. Sonymen qatar ol bastapqyda ózin ózi qorǵaýdy kózdegenimen, zań talaptaryna sáikes memlekettik qorǵaýshymen jumys isteýge májbúr bolǵanyn aitty.
Al jábirlenýshi taraptyń ókilderi qorǵaý tarapynyń ýájderimen kelispeitinin bildirip, birneshe qarsy ótinishhat usyndy. “Eskad” JShS-niń advokaty Bajkenovanyń keibir málimdemeleri shyndyqqa sáikes kelmeitinin aityp, sottalýshynyń kompaniia atyna sotqa deiingi talap-aryz joldanǵany týraly sózi durys emes ekenin málimdedi.
Qazirgi ýaqytta sot otyrysy jalǵasyp jatyr. Sot barlyq ótinishhatty qarap, olarǵa quqyqtyq baǵa bergennen keiin isti máni boiynsha qaraýǵa kóshedi.
Eske salaiyq, Gúlnára Bajkenovaǵa Qazaqstan Respýblikasy Qylmystyq kodeksiniń 189-baby (“Senip tapsyrylǵan bótenniń múlkin iemdený nemese ysyrap etý”), 214-baby (“Zańsyz kásipkerlik”) jáne 274-baby (“Kórineý jalǵan aqparat taratý”) boiynsha aiyp taǵylǵan. 2025 jylǵy 1 jeltoqsannan beri ol úiqamaqta otyr.
