Almatyda daryndy balalarǵa arnalǵan «Abai ulttyq mektebiniń» jańa kampýsy saltanatty túrde ashyldy. Bul – eldegi bilim berý salasy úshin mańyzdy jobalardyń biri. Zamanaýi úlgide salynǵan jańa bilim ordasy oqýshylardyń sapaly bilim alyp, jan-jaqty damýyna barlyq múmkindik jasap otyr, dep habarlaidy dalanews.kz.
Saltanatty sharaǵa QR Parlamenti Senatynyń tóraǵasy Máýlen Áshimbaev, Oqý-aǵartý ministri Juldyz Súleimenova, Almaty qalasynyń ákimi Darhan Satybaldy, memleket jáne qoǵam qairatkerleri, bilim salasynyń ardagerleri, ustazdar men mektep túlekteri qatysty.
Jańa kampýs Almaty qalasyndaǵy «Daryn» shaǵyn aýdanynda ornalasqan. 900 orynǵa arnalǵan keshende keń pándik zerthanalar, sport jáne akt zaldary, STEM-ortalyq, kitaphana, shyǵarmashylyq sheberhanalar, Abai mýzeii, bassein men sport alańdary qarastyrylǵan. Sonymen qatar muǵalimder úii men 350 oryndyq jataqhananyń qurylysy júrgizilip jatyr.
Qazirgi tańda mektepte 351 oqýshy bilim alyp jatyr. Olarǵa 72 pedagog dáris beredi. Olardyń qatarynda pedagog-sheberler, zertteýshiler, sarapshylar men moderatorlar bar.
Resmi shara barysynda qonaqtar oqýshylardyń ǵylymi jobalar kórmesin tamashalap, dizain jáne tehnologiia kabinetteri, keramika sheberhanasy, mektep mýzeii men shyǵarmashylyq alańdardyń jumysymen tanysty.
Saltanatty jiynda sóz sóilegen Máýlen Áshimbaev Memleket basshysy bilim sapasyn arttyrý máselesine erekshe kóńil bólip otyrǵanyn aitty.
– Prezidentimiz Qasym-Jomart Toqaev elimizde bilim sapasyn arttyrýǵa airyqsha nazar aýdaryp keledi. Bul – «Ádiletti Qazaqstandy» qalyptastyrý jolyndaǵy mańyzdy baǵyttardyń biri. Búgin ashylyp otyrǵan «Abai ulttyq mektebiniń» jańa deńgeige kóterilýi – osy keshendi jumystyń naqty nátijesi, – dedi Senat tóraǵasy.
Onyń aitýynsha, tarihy tereń bul bilim ordasynyń negizi 70 jyl buryn qalanǵan. Alǵashynda qazaq tili men ádebietin tereńdetip oqytýǵa baǵyttalǵan mektep búginde ulttyq mártebege ie zamanaýi bilim berý ortalyǵyna ainalyp otyr.
Al Juldyz Súleimenova mektepke qatysty tarihi ádilettilik qalpyna keltirilip jatqanyn atap ótti.
– 2023 jyldan bastap Memleket basshysy Qasym-Jomart Toqaev aiqyndaǵan «Zań jáne tártip» qaǵidaty aiasynda mekteptiń burynǵy taýdyń bókterindegi territoriiasy qaitarylyp jatyr. Sondyqtan Abai mektebine qatysty tarihi ádilettilik ornap jatyr deýge tolyq negiz bar. Bul – 900 balaǵa arnalǵan úlken keshen. Sonymen birge balalarǵa arnalǵan internat salynyp jatyr. Aldaǵy kezeńderde júzý basseini men zamanaýi zerthanalar iske qosylady, – dedi ministr.
Almaty qalasynyń ákimi Darhan Satybaldy áleýmettik jelidegi paraqshasynda bul jobanyń megapolis úshin erekshe mańyzǵa ie ekenin atap ótti.
– Bul jai ǵana jańa ǵimarattyń ashylýy emes, bolashaq urpaqtyń bilimi, qundylyqtary men dúnietanymy qalyptasatyn zamanaýi bilim berý ortasyn qurý. Almaty bilim berý salasyn damytýǵa erekshe kóńil bóledi. Mundai bastamalar joǵary bilim standarttaryn qalyptastyryp, daryndy jastarǵa jańa múmkindikter ashady, – dedi qala ákimi.
Sondai-aq ol mekteptiń pedagogikalyq ujymyna alǵys bildirip, sanaly ári jaýapkershiligi joǵary urpaq tárbieleýdegi ustazdardyń eńbegin erekshe atap ótti.
Jiyn barysynda mekteptiń ulttyq qundylyqtardy zamanaýi bilim berý júiesimen ushtastyratyn jańa ortalyqqa ainalatyny aityldy. Munda oqýshylar tek akademiialyq bilim alyp qana qoimai, ǵylymi izdenispen, shyǵarmashylyqpen jáne tehnologiialyq jobalarmen de ainalysa alady.
Qatysýshylardyń pikirinshe, jańa kampýs daryndy jastardyń áleýetin ashýǵa, ulttyq rýhani qundylyqtardy dáripteýge jáne eldiń intellektýal býynyn qalyptastyrýǵa zor úles qospaq.
