Almaty oblysynyń Kókqainar aýylynda 11-synyp oqýshysy qaitys boldy. Marqumnyń týystary qaiǵyly oqiǵaǵa deiin oǵan mektep muǵalimi tarapynan psihologiialyq qysym jasalǵanyn málimdedi, dep habarlaidy dalanews.kz.
Kriminalnyi Kazahstan telegram arnasynyń málimetinshe, oqiǵa 23 sáýirde bolǵan. Qyz "Meniń mektebim" gimnaziiasynda bilim alǵan. Týystarynyń sózinshe, ol osy bilim ordasynda jumys isteitin muǵalimniń 19 jastaǵy ulymen kezdesip júrgen. Alaida pedagog olardyń qarym-qatynasyna qarsy bolyp, qyzdyń ultyna qatysty kemsitetin sóz aitqan.
"Ol muǵalimniń ulymen kezdesip júrgen. Biraq anasy olardyń qarym-qatynasyna qarsy bolyp, "maǵan uiǵyr kelinniń qajeti joq" degen", - deidi marqumnyń týystary.
Jaqyndarynyń málimdeýinshe, áleýmettik jelide birneshe jasóspirimniń elektrondy temeki shegip otyrǵan videosy taraǵannan keiin oqýshyny ata-anasyn mektepke shaqyrtýmen jáne sotqa júginýmen qorqytqan.
Týystary qyzdyń máseleni sheshý úshin muǵalimmen sóilesýge barǵanyn aitady. Alaida pedagog odan ulymen budan bylai aralaspaityny týraly qolhat jazýdy talap etken degen boljam bar.
"Qyzymyz muǵalimmen sóilesip, jaǵdaidy túsindirgisi kelgen. Biraq odan ulymen qarym-qatynasyn toqtatatyny týraly qolhat jazýdy talap etken. Oǵan psihologiialyq qysym jasaldy dep esepteimiz", - deidi otbasy músheleri.
Qaitys bolar aldynda oqýshy ata-anasyna qysqa jazba qaldyrǵan.
"Anashym, ákeshim, sizderdi jaqsy kóremin. Mende basqa amal bolmady", - delingen jazbada.
Qaiǵyly jaǵdaidan beri tórt ai ótse de, marqumnyń otbasy oqiǵanyń mán-jaiyna qatysty saýaldaryna áli naqty jaýap almaǵanyn málimdedi. Týystary istiń jan-jaqty ári ádil tergelýin talap etip otyr.
"Tórt ai ótti, biraq áli kúnge deiin naqty jaýap joq. Biz bolǵan jaǵdaidyń barlyq mán-jaiy anyqtalyp, kináliler zań aldynda jaýap bergenin qalaimyz", - deidi jaqyndary.
Al gimnaziia ákimshiligi tergeýge kómektesip jatqanyn jáne quqyq qorǵaý organdaryna qajetti qujattardyń barlyǵyn usynǵanyn habarlady.
"Mektep quqyq qorǵaý organdarymen birlesip jumys istep, suratylǵan qujattardyń barlyǵyn tapsyrdy. Tergeý aiaqtalǵanǵa deiin qosymsha túsinikteme bermeimiz", - delingen bilim ordasynyń habarlamasynda.
