Almatyda 4 naýryzda jer silkinisi tirkeldi. Ádette mundai oqiǵalar naryqtaǵy baǵalarǵa da áserin tigizedi.
Krisha.kz sarapshylary páter satý jiilep ketti me, Astanada jyljymaityn múlikke, Almatyda jer úige suranys artty ma degen saýaldarǵa jaýap izdedi, - dep habarlaidy Dalanews.kz.
Almatylyqtar páter sata bastady ma?
Almatyda páter satý jóninde jańa habarlandyrý sany artqan joq. Kórsetkishter shamamen basqa kúnderdegidei.
Astanada páterge suranys artty ma?
Krisha.kz derekterine súiensek, 5 naýryzda Astanada jyljymaityn múlik satyp alǵysy keletinder sany óspegen. Aldyńǵy dúmpýden keiin de suranys ózgermedi.
Jer úi izdegender bar ma?
Jer úi naryǵynda táýligine jalǵa beriletin baspanaǵa suranys artty. Habarlandyrý qaralymy men qońyraý sany bir kúnde 3 ese ósti. Ótken jolǵydai adamdar aftershokty kúte turýdyń qaýipsiz joldaryn izdedi.
Jer úidi jalǵa alý boiynsha baǵa ózgergeni týraly aqparat joq.
Suranystyń artýyna aldaǵy merekeler de áser etip otyr. Jer úidi uzaq merzimge jalǵa berý týraly habarlandyrý qaralymy da birden eki ese ósti. Qańtarda da jaǵdai osyndai bolǵan. Jer silkinisinen keiin kelesi kúni Almatyda jalǵa beriletin úilerge suranys 4 ese ósti. Biraq birneshe kúnnen keiin turaqtandy.
Almatyda jer úiler satylyp jatyr ma?
Almatyda qańtardaǵy oqiǵadan keiin úi satý týraly habarlandyrýǵa qyzyǵýshylyq artty. Aqpannyń aiaǵyna qarai bul úrdis tómendep, 4 naýryzda qaita ósti.
Almatydaǵy jer úidi pátermen salystyrýǵa kelmeidi. Úidiń baǵasy páterge qaraǵanda áldeqaida joǵary (eki bólmeli páter satsańyz, úi satyp ala almaisyz). Barlyq jer qaýipsiz emes, sel, kóshkin bolǵan jaǵdailar da belgili, jaǵdai jasalǵan jerler de az.
5 naýryzdaǵy jaǵdai boiynsha Krisha.kz sarapshylary úi men saiajai baǵasyndaǵy ózgeristerdi baiqamady.
Qańtarda Almatydaǵy jer úi saýdasy 36 paiyzǵa tómendedi, biraq bul naqty kórsetkish emes, sebebi birinshiden, qańtarda alys-beris azyraq bolady, ekinshiden, jer silkinisi aidyń aiaǵynda boldy jáne satyp alatyn ýaqyt bolmady.
Satyp alýshylar ne nársege mán bere bastady?
Jer silkinisinen keiin Krisha.kz qoldanýshylary izdeý kezinde qabat sanyn jii tańdai bastady, biraq tómengi qabatqa suranys aitarlyqtai óspedi.
Almatyda tómengi qabattaǵy páterge jappai suranys joq.
Satýshylar ne istedi?
Almatydaǵy páter satýshylar dúmpýden keiingi úidiń jaǵdaiy týraly jaza bastady: "jer silkinisi kezinde úi shaiqalmady, nyq tur", "jer silkinisinen keiin buzylǵan jerler men jaryqtar joq", "úi qaýipsiz aimaqta, jaryqtardan alys ornalasqan" jáne t.b..
Sarapshylar naryq ózgeretindei ýaqyt ótpegenin aitty. Eleýli ózgerister bolsa, keiinirek baiqalady eken.
