Osynaý ulttyq qundylyqty damytyp kele jatqan ismerler arqyly ata-babalarymyzdyń kózindei bolǵan óner ómirsheń bolyp, búgingi kúnmen úndesip otyr.
Óziniń áleýmettik, uzaq merzimdi jobalaryna únemi qoldaý bildirip kele jatqan «Shevron» kompaniiasy on jyldan astam ýaqyt osy jobany qoldap keledi.
Almaty Taýers kesheninde «Sheber-2017» Qazaqstan qolónershileriniń respýblikalyq baiqaýyna qatysqan sheber qoldy, ismerlerdi marapattaý rásimi ótti. Dál osy kúni baiqaý jeńimpazdarynyń jumystary qoiylǵan kórme de óz jumysyn bastady. «Shevron» kompaniiasynyń ókili Leila Aitmuhanova 2009 jyldan beri ótkizilip kele jatqan jobany el qolónershileriniń asyǵa kútetinin aita kele, Qazaqstandaǵy qolónerdi damytý jobasy áleýmettik investitsiialardyń eń qomaqtysy ekendigin jetkizdi.
Jalpy, «Sheber» jobasy 2006 jyldan bastap «Shevron» kompaniiasynyń bastamasymen ári qarjylai qoldaýymen turaqty júzege asyp keledi.
Bul joba «Shevronnyń» «Qazaqstandaǵy qolóner jáne dástúrli kásipshilikti jańǵyrtý» baǵdarlamasynyń bir bóligi ispetti.
Tusaýy kesilgen jobany Qazaqstan Qolónershiler odaǵy, Our Heritage qoǵamdyq qorymen, QR Mádeniet jáne aqparat ministrligimen «Ortalyq Aziianyń Eýraziia qorlarymen birlesip júzege asyrýda. Osy jobanyń qol jetkizgen nátijesi nede? Eń bastysy, osy jyldar ishinde Qazaqstan qolónershiler odaǵy quryldy. Biylǵy jyly odaq óziniń besjyldyǵyn atap ótýde. Dál qazir Qolónershiler odaǵy mádeni jáne rýhani qundylyqtardy, eldiń tarihi, etnografiialyq muralaryn keleshek urpaqqa jetkizý úshin aianbai qyzmet kórsetip otyr.
Biylǵy jyly «Sheber» baiqaýyna qatysý úshin elimizdiń ár qiyrynan 90 ótinish kelip tústi.
Kelip túsken jumystardyń barlyǵyn da júldege laiyqty dep aitýǵa bolady. Degenmen, baiqaýdyń ózindik talaby, sharty bar. Jeńimpazdarǵa dep belgilengen 20 jumystyń sany arta túsip, 36 jumys eń úzdik dep tanyldy.
Jeńimpazdar «Murager», «Joǵary sheberlik», «Asyl ustaz», «Joǵary sapa», «Jańashyldyq», «Daryndy bastaý», «Tóltýmalyq», «Ekodizain», «Ulttyq mádeni brend», «Qazaqstandyq ulttyq kádesyi», «Ozat isker» atty nominatsiialar boiynsha marapattaldy. Al eń úzdik sheberge Qazaqstan Qolónershiler odaǵynyń bas marapaty – «Has sheber» tabystaldy.
Qazaqstan Qolónershiler odaǵynyń tóraiymy Aijan Bekqulovanyń aitýynsha, jyl sanap sheberler qatary artyp, ulttyq óner damyp keledi. Ásirese, kiiz, zergerlik, aǵash oiý, temir, toqymashylyq pen dástúrli kiimderge degen halyqtyń qyzyǵýshylyǵy men suranysy arta túsken.
Derekkóz: qamshy.kz
