Almaty halyqaralyq áýejaiynda Nipah virýsy anyqtalǵan jaǵdaida áreket etý tetikteri boiynsha vedomstvoaralyq oqý-jattyǵý ótti. Bul týraly Qazaqstan Respýblikasy Densaýlyq saqtaý ministrliginiń Sanitariialyq-epidemiologiialyq baqylaý komitetiniń baspasóz qyzmeti málimdedi, dep habarlaidy Dalanews.kz.
Vedomstvo málimetinshe, oqý-jattyǵý qoǵamdyq densaýlyq saqtaý salasyndaǵy tótenshe jaǵdailarǵa den qoiýǵa daiyndyqty tekserýge baǵyttalǵan. Negizgi maqsat – áýejaidaǵy kirý pýnkti qyzmetteriniń asa qaýipti juqpaly aýrýlardy, sonyń ishinde Nipah virýsyn der kezinde anyqtap, oqshaýlaý qabiletin baǵalaý.
Jattyǵýǵa sanitariialyq-epidemiologiialyq qyzmet, jedel meditsinalyq járdem, juqpaly aýrýlar statsionary, Ulttyq qaýipsizdik komitetiniń shekara qyzmeti, keden qyzmeti, politsiia departamenti jáne Almaty qalasynyń halyqaralyq áýejaiynyń mamandary qatysty.
Stsenarii boiynsha Nipah virýsyna kúdik keltirilgen jolaýshy anyqtaldy. Barlyq qyzmetter bastapqy sanitariialyq-karantindik baqylaýdan bastap, shartty naýqasty oqshaýlaý, aýrýhanaǵa jatqyzý, indetke qarsy jáne dezinfektsiialyq sharalardy júrgizýge deiingi tolyq algoritmdi pysyqtady.
Oqý-jattyǵý qorytyndysy boiynsha vedomstvoaralyq ózara is-qimyldyń joǵary deńgeide úilesimdi ekeni jáne daiyndyqtyń jetkilikti ekeni rastaldy. Qoldanystaǵy algoritmder yqtimal biologiialyq qaýipterge jedel áreket etip, halyq úshin táýekelderdi barynsha azaitýǵa múmkindik beretini atap ótildi. Shara sońynda ótken jumys keńesinde júrgizilgen jumystar taldanyp, ózara is-qimyldy odan ári kúsheitý jóninde usynystar ázirlendi.
Ministrlik mundai oqý-jattyǵýlar memlekettik shekaranyń sanitariialyq qorǵanys júiesiniń mańyzdy bóligi ekenin jáne eldiń sanitariialyq-epidemiologiialyq qaýipsizdigin qamtamasyz etýge baǵyttalǵanyn atap ótti.
Sondai-aq 2025 jyly sanitariialyq-karantindik baqylaýdan 7,2 million jolaýshy ótkeni, olardyń 86-synda epidemiologiialyq qaýiptiń joǵary belgileri anyqtalyp, barlyǵy meditsina qyzmetkerleriniń tekserýinen ótkeni habarlandy. Asa qaýipti juqpaly aýrýlar tirkelmegen.
