Almatyda "ádemi" nómir alǵysy kelgenderden kóp ótinish túsken, dep habarlaidy Dalanews.kz.
5 qańtardan bastap Qazaqstanda, sonyń ishinde Almatyda da árkim óz kóligine memlekettik tirkeý nómirin resmi jáne zańdy túrde tańdai alady. Osy ýaqyttan beri kólik ielerinen barlyǵy 19 100 ótinish túsken.
Almaty qalalyq Politsiia departamentiniń Ákimshilik politsiia basqarmasynyń bastyǵy Serik Shýmaevtyń aitýynsha, memlekettik nómir avtomatty túrde ǵana berilmei, azamattar bar nusqanyń ishinen ózderine unaǵan áriptik-sandyq kombinatsiiany tańdai alady.
"Memlekettik nómirlerdiń birneshe sanaty qarastyrylǵan. Olardyń quny 10-nan 280 ailyq eseptik kórsetkishke (AEK) deiin barady. Baǵa kólik iesi tańdaǵan sandyq nemese áriptik kombinatsiiaǵa bailanysty. Memlekettik nómirlerdi satyp alýdan túsken qarajat qala biýdjetine túsedi. Qazir birdei úsh sannan turatyn, basynda nemese sońynda nólderi bar nómirlerge suranys óte joǵary", – dep atap ótti Serik Shýmaev.
Qazir nómir tańdaý úshin mamandandyrylǵan halyqqa qyzmet kórsetý ortalyqtary arqyly ótinish berseńiz bolady. Aldaǵy ýaqytta bul qyzmet onlain formatta – elektrondyq úkimet portaly men mobildi qosymshalar arqyly da qoljetimdi bolady.
Qyzmet kórsetý rásimi qarapaiym ári túsinikti: azamat júiedegi qoljetimdi kombinatsiialardan kerek nómirdi tańdaidy, tekserýden ótedi, qyzmet aqysyn tólep, ótinish beredi.
"Áriptik jáne sandyq kombinatsiialar jalpy qabyldanǵan moraldyq normalarǵa sai bolýǵa tiis. Iaǵni balaǵat sózder nemese bireýdiń ar-namysy men qadir-qasietine nuqsan keltiretin jazýy bar nómirler bolmaidy", – deidi Almaty qalalyq Politsiia departamentiniń resmi ókili Saltanat Ázirbek.
