Ákimdik qyzmetkeri: «Qurmetti aqsaqaldar, qazaq tilinde sóilessek qalai bolady?»
Vladimir Chepel qazirgi tańda Almaty oblysy Qapal aýyly ákimdiginiń bas mamany qyzmetinde. Ol kózin ashqaly aýyldaǵy qazaq balalarymen birge oinap óskendikten qazaq tilin jetik meńgergen.
Ákimdik qyzmetkeri ózine kelgen aýyl aqsaqaldarynyń máselesin esh qiyndyqsyz túsinip, birden kómektesetinin aitady.
– Aýyldyq aimaqtarda qazaq tilin bári biledi jáne til deńgeiine bailanysty eshqandai másele joq. Al qalaǵa kelseń, munda másele bar ekenin kóresiń. Qalada jastar qazaqsha sóilemeidi. Birde jumys barysynda maǵan eki aqsaqal keldi. Olar meniń túrime qarap, sózderin oryssha bastady. Memlekettik qyzmette qai tilde surasa, sol tilde jaýap berýiń kerek. Sondyqtan orys tilinde jaýap berdim de, «qurmetti aqsaqaldar, qazaq tilinde sóilessek qalai bolady» dep suradym. Olar qýanyp ketti. «Balam qazaq eken ǵoi» dep jatyr. Mundai maqtanǵa masairap, tipti júregiń jylyp, birazǵa deiin máz bolasyń. Sondyqtan qazirgi jastardy eki-úsh aiǵa aýylǵa jiberse, aýylda tildiń, dinniń saqtaýshylary bolyp otyrǵan aqsaqaldardyń olarǵa úireteri kóp bolar edi, – deidi Vladimir Chepel.
Ákimdik qyzmetkerinde qazaq tilin aýylda úirený týraly oi Nur-Sultan qalasynda jinalysta áriptesteriniń ózara oryssha tildesýinen keiin týyndaǵan.
– Bizdiń áralýandyǵymyz basymdyǵymyz, al kúshimiz birlikte ekenin Elbasy áý basta aitqan bolatyn. Qazirgi Memleket basshysy Qasym-Jomart Kemeluly qoǵamdyq kelisimdi saqtap, tatýlyǵymyzdy arttyrýda memlekettik tildiń róline airyqsha mán berý qajettigin aitty. Biz eń aldymen týǵan eldiń memlekettik tilin bilýge mindettimiz. Memlekettik tildi bilmeitin memlekettik qyzmetkerlerdi aýylǵa jiberý kerek. Ári tájiribe almasyp, ári sondaǵy ata-apalarymyzdan qazaqsha sóileýdi úirenip qaitar edi. Túbi qazaq tili – uly dalanyń ultaralyq tili bolatynyna senimdimin! – deidi Vladimir Chepel.
