Zańger Dáýlethan Ahmetov Prezident Qasym-Jomart Toqaevqa úndeý jasap, Moldahan Ádilethanǵa qatysty qylmystyq isti baqylaýǵa alýdy surady. Onyń sózinshe, Almaty qalasynyń Almaly aýdandyq sotynda qaralyp jatqan qylmystyq is barysynda prokýratýra aiypty ózgertýge áreket etken, sondyqtan istiń zań aiasynda qaralýyna qatysty kúmán týyndaǵan, dep habarlaidy dalanews.kz.
Ahmetovtiń aitýynsha, 3 shilde kúni Qylmystyq kodekstiń 274-babynyń 2-bóligi 3-tarmaǵy boiynsha aiyptalǵan Moldahan Ádilethanǵa qatysty úkim jariialanýy tiis bolǵan. Alaida sot otyrysy sozylyp, keiin qosymsha politsiia qyzmetkerleri shaqyrylǵan. Sondai-aq onyń sózinshe, sotqa kelgen jýrnalisterdiń zalǵa kirýine múmkindik berilmegen.
Zańgerdiń málimdeýinshe, sot protsesi barysynda prokýratýra aiypty Qylmystyq kodekstiń 274-babynyń 3-bóligine aýystyrýdy talap etken. Ol mundai talaptyń zańǵa qaishy ekenin aityp, qylmystyq is alǵashynda 274-baptyń 2-bóligi boiynsha tirkelgendikten, úkim de sol bap aiasynda shyǵarylýy qajet dep esepteidi.
“Is bastapqyda Qylmystyq kodekstiń 274-babynyń 2-bóligi boiynsha qaraldy. Sondyqtan úkim de sol bappen shyǵýy kerek edi. Biraq prokýratýra eshqandai negizsiz 274-baptyń 3-bóligin qoldanýdy talap etip otyr”, – dedi Ahmetov.
Onyń aitýynsha, sot barysynda Qylmystyq kodekstiń 54-babyn, iaǵni jaýaptylyq pen jazany aýyrlatatyn mán-jailardy qoldaný máselesi de kóterilgen. Alaida zańger bul úshin qajet dálelder joq ekenin aitty.
Ahmetovtiń pikirinshe, prokýratýra sot úkimi shyqpai turyp aiypty ózgertýge áreket jasap otyr. Ol muny zań talaptaryna sáikes kelmeitin jaǵdai ekenin jetkizdi.
Sonymen qatar zańger 274-baptyń 3-bóligin qoldaný úshin memleketke, uiymǵa nemese azamattarǵa iri zalal keltirilgeni dáleldenýi tiis ekenin aitty. Onyń sózinshe, bul iste mundai zalal anyqtalmaǵan.
Ahmetov Moldahan Ádilethan ózine qatysty aitylǵan jaittardyń bir bóligin joqqa shyǵarmaitynyn da jetkizdi.
“Ádilethan burynǵy politsiia qyzmetkerlerine qatysty aitqanyn moiyndap otyr. Ol muny jasyrmaidy. Biraq bul basqa, aýyrlaý aiyp taǵýǵa negiz bolmaýy kerek”, – dedi zańger.
Sondai-aq ol jol-kólik oqiǵasynan keiin qyzmetinen bosatylǵan eki politsiia qyzmetkeriniń jumystan shyǵarylýyna Ádilethannyń qatysy bolmaǵanyn aitty. Zańgerdiń sózinshe, olardy ishki ister organdary óz sheshimimen qyzmetten bosatqan.
Ahmetov Ádilethannyń kámeletke tolmaǵan úsh balasy bar ekenin atap ótti. Sondyqtan sot barlyq mán-jaidy jan-jaqty eskerip, ádil sheshim qabyldaýy qajet dep sanaidy.
Úndeý sońynda zańger Prezident Qasym-Jomart Toqaevtan iske nazar aýdarýdy surap, Qazaqstanda ádil sot qaǵidaty saqtalýy tiis ekenin aitty.
