A. Perýashev: "Bir aýlada 10-15 jas otbasy páter jaldap júr. Al orystildi jýrnalister meniń usynysymdy mazaqqa ainaldyrýda"
— Áńgimeni sizdiń Úkimetke joldaǵan depýtattyq saýalyńyz tóńireginde órbitsek.
— Meniń bul jolǵy depýtattyq saýalym aýyldan qalaǵa kelip jumys istep júrgen elimizdiń jastaryn qoldaýǵa arnaldy. Qazir bazarlardyń mańyna baryp tekserseńiz, kóresiz, bireýdiń aýlasynda 10-15 otbasy qysylyp-qymtyrylyp ómir súrip jatyr. Olar jetiskennen júrgen joq qoi. Baspana alýǵa, ipoteka tóleýge múmkinshiligi joq. Bundai azamattar qanshama?! Olar da bizdiń eldiń azamattary ǵoi.
— Úkimet qabyldaǵan «Nurly jer» baǵdarlamasy bar emes pe? Onymen siz kótergen problemany sheshýge ne kedergi?
— Iá, bar. Biraq sol «Nurly jer» baǵdarlamasy boiynsha ýaqytsha baspanany áleýmettik turmysy tómen otbasylardyń ishinde qala azamattary ǵana ala alady. Qalǵandary bul sanatqa kirmeidi.
— Túsinikti boldy. Endi myna saýalǵa jaýap berińizshi, sizdiń Úkimetke usynysyńyzdy orystildi baspasóz durys túsinbei qalǵan sekildi. Olarǵa túsinikti tilde sóileseńiz de, olardyń sizge dóń-aibat kórsetýi birtúrli kórindi.
— Neni meńzep otyrǵanyńyzdy túsindim. Keibir orystildi saittar «Azat Perýashev Úkimetke as úii joq, ájethanasy joq bólmeler salýdy usyndy» dep meni kelekege ainaldyrypty. Sony aityp tursyz-aý. Men shynynda jataqhanalar arzan baǵada bolýy úshin as úii ortaq jáne ájethanasy ortaq kommýnaldyq jataqhanalar salynýyn suraǵan bolatynmyn. Mundai jaǵdaida baspana baǵasy ádettegiden 40 paiyz arzan bolatyny da anyq.
Al orystildi BAQ-tyń qarsy shyqqanyna men tań qalǵan joqpyn. Esterińizde bolsa, bir-eki apta buryn men Parlamentte «Qazaqstan azamattyǵyn alý úshin qazaq tilinen jáne tarihynan emtihan tapsyrý kerek» degen bastama kóterdim. (Bul jaily suhbat gazetimizdiń №14 (1143) 6 sáýirdegi nómirinde shyqty). Ol kezde de orystildi BAQ óre túregelip, qarsy shyqty. Olarǵa ulttyq múdde týraly ustanym unamaityny baiqalady. Bárin ar-uiattaryna qaldyrdym.
