Qazaqstannyń Kólik ministrligi Astana - Frankfýrt baǵyty boiynsha ushqan Air Astana áýe kompaniiasynyń reisine qatysty oqiǵany tekseredi, dep habarlaidy dalanews.kz.
8 mamyrda KZR921 reisin oryndaǵan Airbus A321 ushaǵy Astana halyqaralyq áýejaiynan ushyp shyqqannan keiin ekipaj qozǵaltqyshtardyń birinde aqaý paida bolǵanyn anyqtap, PAN-PAN shuǵyl dabylyn jariialaǵan. Osydan keiin ushaqty Aqtóbedegi qosalqy áýejaiǵa qondyrý týraly sheshim qabyldanǵan.
Ushaq bortynda 93 jolaýshy, onyń ishinde tórt bala men bir náreste, sondai-aq, ekipajdyń toǵyz múshesi bolǵan. Áýe kemesi Aqtóbe áýejaiyna jergilikti ýaqytpen saǵat 11:34-te shtattyq rejimde qonǵan.
Aldyn ala málimet boiynsha oqiǵa ushaqtyń kúshtik qondyrǵysyndaǵy tehnikalyq aqaýǵa bailanysty bolǵan. Qazir zardap shekkender men áýe kemesi zaqymdanǵany týraly aqparat joq.
Ministrlik bul jaǵdaidy aýyr aviatsiialyq oqiǵa retinde tirkep, tergeýdi Kóliktegi oqiǵalardy tergep-tekserý departamenti júrgizetinin málimdedi.
