Qazaqstannan tys jerde 17 jyl boiy jasyrynyp, halyqaralyq izdeýde bolǵan Iu. Iýsýpov Almatyda 2008 jyly jasalǵan atyshýly adam ólimine qatysqany úshin 15 jylǵa bas bostandyǵynan aiyryldy, dep habarlaidy dalanews.kz.
«Iýsýpov uzaq jyldar boiy Qazaqstannan tys jerde qujattaryn ózgertip, basqa anketalyq derektermen jasyrynyp júrgen. Ol 15 jylǵa bas bostandyǵynan aiyryldy», – dep habarlady bas prokýratýra.
Prokýratýra málimetinshe, qylmys 2008 jylǵy 19 mamyrǵa qaraǵan túni Almaty qalasynyń ortalyǵynda bolǵan. Iýsýpov pen onyń sybailasy A. Kovalenko qylmystyq orta ókilimen janjaldasyp, jábirlenýshini Fýrmanov kóshesindegi úidiń mańynda ańdyǵan. Er adamǵa birneshe ret oq atylyp, onyń ishinde basynyń jelke tusyna baqylaý maqsatynda oq tigen. Alǵan jaraqattarynan ol oqiǵa ornynda qaitys bolǵan.
Adam óltirgennen keiin Iýsýpov Qazaqstannan ketip, halyqaralyq izdeýge jariialanǵan.
Onyń sybailasy Kovalenko qylmystyq áreketin jalǵastyrǵan. 2008 jyldyń jazynda ol Qapshaǵaidaǵy «Staraia krepost» demalys aimaǵynda bolǵan qarýly oqiǵadan keiin ustalǵan. Oqiǵa kezinde politsiia qyzmetkeri qaza taýyp, taǵy tórt adam aýyr jaraqat alǵan. 2009 jyly Kovalenko 23 jylǵa bas bostandyǵynan aiyrylǵan.
Vedomstvonyń málimetinshe, Iýsýpovty izdeý jumystary birneshe jyl boiy jalǵasqan. Qylmystyq ortada ol «King-Kong» laqap atymen tanymal bolǵan jáne qyrǵyzstandyq belgili qylmys áleminiń ókiliniń ainalasyna kirgen degen aqparat bar. Sondai-aq Qyrǵyzstannyń quqyq qorǵaý organdary ony 2007 jyly Bishkekte kólik jýý ornynyń iesin óltirýge qatysy bar degen kúdikpen izdegen.
Iýsýpov birneshe jyl boiy Eýropa elderinde qujattaryn ózgertip, basqa anketalyq derekterdi paidalanyp jasyrynǵan.
2025 jylǵy tamyzda Litva shekarasynan ótý kezinde ol ustaldy. Sol jyldyń qarashasynda Qazaqstan Bas prokýratýrasynyń suraýy boiynsha Litvadan elge ekstraditsiialandy.
Bas prokýratýranyń málimetinshe, biyl shildede Almaty qalasynyń qylmystyq ister jónindegi mamandandyrylǵan aýdanaralyq soty Iýsýpovty aldyn ala sóz bailasqan adamdar toby jasaǵan adam óltirýge kómekteskeni úshin kináli dep tanyp, 15 jylǵa bas bostandyǵynan aiyrý jazasyn taǵaiyndaǵan.
