Qazaqstannyń Jasandy intellekt jáne tsifrlyq damý ministrligi 15 million qazaqstandyqtyń jeke derekteri internetke tarap ketti degen aqparatqa qatysty tekserý júrgizip jatqanyn málimdedi, dep habarlaidy dalanews.kz.
Vedomstvo mamandary tiisti memlekettik organdarmen birlesip, jelide jariialanǵan derekterdiń úlgilerin zerttep, olardyń qaidan shyqqanyn anyqtaýǵa kirisken. Ministrliktiń málimetinshe, tarady delingen aqparattyń birqatar belgileri elektrondyq úkimet júiesinde saqtalatyn derekterge sáikes kelmeidi.
Máselen, eGov júiesinde azamattardyń tólqujat kóshirmeleri darknette kórsetilgen formatta saqtalmaidy. Sondai-aq elektrondyq qujattardyń qurylymy da múlde basqa.
«Qazirgi ýaqytta elektrondyq úkimet júieleriniń buzylǵanyn nemese atalǵan derekter bazasynyń eGov platformasynan alynǵanyn rastaityn dálelder joq. Darknettegi qoldanýshynyń bul baza eGov-ten alynǵan degen málimdemesi ózdiginen júieniń buzylǵanyn dáleldei almaidy», – dep habarlady ministrlik.
Qazir tehnikalyq tekserý jalǵasyp jatyr. Onyń qorytyndysy shyqqannan keiin qosymsha aqparat beriledi.
Osy jaǵdaiǵa bailanysty ministrlik qazaqstandyqtarǵa jeke derekterin qorǵaýǵa muqiiat bolýǵa keńes berdi. Atap aitqanda, SMS arqyly keletin rastaý kodtaryn, parolder men ETsQ kiltterin bógde adamdarǵa bermeý, kúmándi siltemelerdi ashpaý jáne ár servis úshin bólek qupiiasóz qoldaný usynylady.
Aita keteiik, buǵan deiin darknette ózin shymzz13 dep tanystyrǵan qoldanýshy Qazaqstan azamattarynyń shamamen 15 million jazbasyn qamtityn derekter bazasyn satýǵa shyǵarǵanyn málimdegen edi. Alaida ázirge bul aqparattyń qaidan alynǵany resmi túrde rastalǵan joq.
