Mańǵystaý oblysynda áskeri oqý-jattyǵý kezinde 14 áskeri qyzmetkerdiń qaza tabýy qoǵamda qyzý talqylanǵan máselelerdiń birine ainaldy. Osy oqiǵadan keiin qoǵam belsendisi Murat Daniiar Respublica partiiasynyń sailaýaldy ýádelerin eske salyp, partiia ókilderine suraq qoidy, dep habarlaidy dalanews.kz.
Onyń aitýynsha, partiia Quryltai sailaýy aldyndaǵy baǵdarlamasynda Qazaqstan armiiasyn kezeń-kezeńimen tolyq kelisimshart negizindegi qyzmetke kóshirýge ýáde bergen. Alaida Quryltai jumysy bastalǵaly beri bul másele depýtattar tarapynan kóterilmegen.
Murat Daniiar áleýmettik jelidegi jazbasynda partiianyń sailaýaldy baǵdarlamasynda armiiany jańǵyrtý, qorǵanys qabiletin kúsheitý jáne kelisimshart negizindegi áskeri qyzmetti kezeń-kezeńimen engizý týraly naqty tarmaqtar bolǵanyn atap ótti.
Onyń sózinshe, Aqtaýdaǵy qaiǵyly oqiǵadan keiin Quryltaidyń birneshe otyrysy ótkenine qaramastan, Respublica partiiasynyń depýtattary bul taqyrypqa qatysty ashyq málimdeme jasaǵan joq.
Sonymen birge ol partiianyń qaza tapqan áskeri qyzmetkerlerdiń otbasylaryna 100 million teńge kóleminde qarjylai kómek kórsetkenin atap ótti. Alaida bul másele tek materialdyq qoldaýmen shektelmeýi kerek dep esepteidi.
«Eger siz Respublica partiiasyna daýys bergen bolsańyz, onda olardyń sailaýaldy ýádeleriniń oryndalýy týraly suraýǵa tolyq moraldyq quqyǵyńyz bar. Eń bolmasa bergen ýádeleri jóninde pikir bildirip, túsinikteme berýin talap ete alasyz», – deidi ol.
Murat Daniiardyń aitýynsha, ózi bul partiiaǵa daýys bermegendikten, qandai da bir talap qoiýdy durys sanamaidy. Degenmen partiiany qoldaǵan azamattar ózderi tańdaǵan saiasi kúshten sailaýaldy mindettemelerdiń oryndalýy jóninde jaýap surai alady.
