Helios Airways áýe kompaniiasynyń 522-reisine qatysty apat Grekiia azamattyq aviatsiiasy tarihyndaǵy eń aýyr qaiǵyly oqiǵalardyń biri retinde este qaldy, dep dalanews.kz tilshisi kznews.kz saityna silteme jasap habarlaidy.
2005 jyldyń tamyzynda Kiprden ushqan Boeing 737 laineri álemdik aviatsiia tarihyndaǵy eń úreili oqiǵalardyń birine ainaldy. Bortta 121 adam bolǵan ushaq birneshe saǵat boiy avtopilotpen ushyp, ekipaj ben jolaýshylar es-tússiz kúide qalǵan. Bailanysqa shyqpaǵan lainer aspanda únsiz qalyqtap, dispetcherler úshin naǵyz "eles ushaqqa" ainaldy.
Qaiǵyly jaǵdaidyń alǵashqy sebebi ushaq áýege kóterilmei turyp-aq bastalǵan. Larnaka áýejaiynda tehnikalyq mamandar germetizatsiia júiesin tekserý kezinde qysym basqarý tetigin qol rejimine aýystyrǵan. Alaida tekseris aiaqtalǵan soń ony qaita avtomatty rejimge qoimaǵan. Ushý aldyndaǵy tekseris kezinde ekipaj da bul qateni baiqamai, lainer áýege aqaýly kúide kóterilgen.
Ushaq biiktik ala bastaǵannan keiin kóp uzamai kabinada eskertý dabyly qosylǵan. Biraq ushqyshtar bul belgini germetizatsiia júiesindegi másele dep emes, ushýǵa daiyndyq konfigýratsiiasyna qatysty eskertý dep qabyldaǵan. Osy ýaqytta salondaǵy ottegi deńgeii tómendep, borttaǵy adamdar birtindep gipoksiiaǵa ushyrai bastaǵan.
Kóp uzamai ushqyshtar da, jolaýshylar da esinen tanyp qalǵan. Al Boeing 737 avtopilot arqyly baǵytyn jalǵastyryp, Grekiia áýe keńistigine kirgen. Ushaq dispetcherlermen bailanysqa shyqpai, Afina mańynda ainalyp usha bergen.
Bailanys úzilgen soń Grekiia Áskeri-áýe kúshteriniń eki F-16 joiǵysh ushaǵy kókke kóterildi. Áskeri ushqyshtar lainerge jaqyndaǵanda, salonda jáne kabinada adamdardyń qozǵalyssyz otyrǵanyn, al ottegi maskalary tómen túsip turǵanyn kórgen.
Keiin kabina ishinde qozǵalys baiqalǵan. Bul – stiýard Andreas Prodromý edi. Ol tasymaldanatyn ottegi ballonyn paidalanyp, ózgelerge qaraǵanda esin uzaq saqtaǵan. Shaǵyn aviatsiia ushaǵyn basqarýǵa ruqsaty bolǵan Andreas komandirlerdi oiatýǵa tyrysyp, áskeri ushqyshtarǵa belgi bergen. Alaida aýyr jolaýshylar lainerin basqarýǵa onyń daiyndyǵy jetkiliksiz edi.
Aqyry ushaqtaǵy janarmai taýsylyp, Boeing Grammatiko aýyly mańyndaǵy taýǵa soǵyldy. Apat ornyna jetken qutqarýshylar tiri qalǵan adamdy tappady.
Tergeý qorytyndysy boiynsha, qaiǵyly oqiǵaǵa adam faktory sebep bolǵan. Germetizatsiia júiesiniń durys baptalmaýy, ushý aldyndaǵy tekseristegi salǵyrttyq jáne dabyl belgisin qate túsiný 121 adamnyń ómirin qidy.
Bul apat aviatsiia salasyna aýyr sabaq boldy. Oqiǵadan keiin birqatar elderde ekipaj ben tehnikalyq qyzmet mamandarynyń ózara áreket tártibi, sondai-aq ushý aldyndaǵy tekseris talaptary qaita qaraldy.
