Qazaqstanda Helicobacter pylori infektsiiasyn emdeýge qoldanylatyn vonoprazan dárisiniń dárihanalarda joqtyǵy jáne onyń tapsyryspen birneshe júz myń teńgege usynylýy týraly Quryltai depýtaty Ashat Aimaǵambetov aitty, dep habarlaidy dalanews.kz.
Aimaǵambetov bul máseleni óziniń jazbasynda kóterdi. Onyń aitýynsha, jeke qabyldaý kezinde azamat dáriger taǵaiyndaǵan zamanaýi preparatty Qazaqstandaǵy kádimgi dárihanalardan taba almaǵan. Naýqasqa 14 kúndik em úshin 20 mg dozadaǵy 28 tabletka qajet bolǵan.
Depýtattyń málimetinshe, Japoniiada Takeda kompaniiasy shyǵaratyn túpnusqa Takecab preparatynyń 28 tabletkasy shamamen 11 myń teńge turady. Malaiziiada 30 tabletkalyq qaptamasy 27–30 myń teńge shamasynda satylady. Al Qazaqstanda osy preparatty tapsyryspen 100 tabletkadan turatyn qaptamada 463 myń teńgege nemese odan da qymbatqa usynǵan.
Osylaisha, Aimaǵambetovtiń sózinshe, patsient ózine qajetti 28 tabletkanyń ornyna shamamen tórt ese kóp dári satyp alýǵa májbúr bolýy nemese taǵaiyndalǵan emnen bas tartýy múmkin. Depýtat bir tabletkanyń Qazaqstandaǵy baǵasy Japoniiadaǵy resmi baǵadan shamamen 12 ese joǵary ekenin atap ótti.
Depýtat biyl dárilik zattardy tirkeý tártibin jeńildetetin zań qabyldanǵanyn eske saldy. Alaida onyń pikirinshe, másele tek tirkeýde emes. Naryqta suranysqa ie, biraq joq preparattardy anyqtap, óndirýshilermen jumys isteý jáne jetkizý tetikterin jeńildetý qajet.
«Zań qabyldandy. Endi onyń jumys isteýin qamtamasyz etý qajet. Negizgi nátije – qaǵaz júzinde qysqarǵan merzimder emes, patsientke qajetti dáriniń dárihanada qoljetimdi baǵamen bolýy», – dep jazdy Aimaǵambetov.
Depýtat bul máseleni Komitet otyrysynda jáne Quryltaida kóteretinin málimdedi.
