АҚШ президенті Дональд Трамп Ресейге қарсы жаңа санкцияларды енгізуді уақытша тоқтату туралы шешім қабылдады. Ол «Грэм заңы» аясында қарастырылып, 18 қазанда күшіне енуі тиіс болған, деп хабарлайды dalanews.kz.
Ақ үй жариялаған құжатта Ресейдің энергетикалық ресурстарын ең көп сатып алатын бес елдің тауарларына 100 пайызға дейін қосымша баж салығын енгізу уақытша тоқтатылған. Сонымен қатар Ресей тауарларына 500 пайыздық баж салығын қолдану мәселесі де кейінге қалдырылған.
Құжатта санкциялық шаралар АҚШ президенті немесе мемлекеттік хатшысы қосымша әрекет қабылдау қажет деп шешкенге дейін қолданылмайтыны көрсетілген.
Сонымен бірге Трамп АҚШ-тың тиісті мемлекеттік органдарына Ресейдің мұнай мен газ жеткізілімдерін бақылауды тапсырған. Егер Вашингтонның ұстанымын қайта қарауға негіз болатын жағдайлар анықталса, бұл туралы Ақ үйге жедел хабарлануы тиіс.
Алайда жаңа шешім АҚШ-тың Ресейге қарсы бұған дейін енгізген санкцияларының күшін жоймайды.
«Грэм заңы» нені көздейді?
Ресейге қарсы санкцияларды күшейту туралы бастаманы республикашыл сенатор Линдси Грэм мен демократ Ричард Блюменталь 2025 жылғы сәуірде көтерген.
Бастапқыда заң жобасы Ресей Украинаға қарсы соғысын жалғастырған кезеңде оның тауарларына 500 пайызға дейін кедендік баж салығын енгізуді қарастырған.
Кейін құжатқа өзгерістер енгізіліп, Ресейден мұнай мен газды ең көп сатып алатын бес мемлекетке, сондай-ақ энергетикалық санкцияларды айналып өтуге көмектесетін елдерге 100 пайыздық баж салығын қолдану мүмкіндігі ұсынылған.
Сонымен қатар Ресейден импортталатын табиғи газ үлесі жалпы тұтынудың 15 пайызынан аспайтын және бұл импортты қысқарту шараларын қабылдап жатқан мемлекеттер үшін ерекшеліктер қарастырылған.
Трамп 18 қыркүйекте санкцияларды күшейту туралы заңға қол қойған. Алайда оның жекелеген ережелерін іске асыруды әзірге тоқтата тұру туралы шешім қабылданған.
Осылайша, АҚШ әкімшілігі Ресейге қатысты қосымша экономикалық қысым жасау мүмкіндігін сақтай отырып, жаңа кедендік шектеулерді енгізуді кейінге қалдырған.
